Almaniyanın paytaxtı Berlində dünyanın 35 ölkəsindən gənc cüdoçuların iştirak etdiyi Avropa Kuboku başa çatıb. İdmançılarımız turnirdə həm fərdi, həm də komanda hesabında parlaq nəticələr göstərərək böyük uğura imza atıblar.

Yarışın son günündə yığmamız aktivinə daha 6 medal yazdırıb. Finala qədər inamla irəliləyən üç təmsilçimiz — Sadiq Məmmədov (74 kq), Ayxan Həsənli (81 kq) və Ömər Axundov (90 kq) həlledici görüşlərdə məğlub olaraq gümüş medalla kifayətləniblər.

Bununla yanaşı, 81 kq çəki dərəcəsində mübarizə aparan Amin Mehdiyev və Yaqub Məmmədov, həmçinin ağır çəkidə (+90 kq) çıxış edən Ruslan Kazımov bürünc medallara sahib çıxıblar. Bu uğur ölkəmizin xüsusilə orta və ağır çəki dərəcələrində ciddi potensiala malik olduğunu bir daha təsdiqləyib.

Azərbaycan yığması Berlin turnirini ümumilikdə 13 medalla (2 qızıl, 5 gümüş və 6 bürünc) tamamlayıb. Bu nəticə ilə ölkəmiz 35 dövlət arasında ümumi komanda hesabında 3-cü yeri tutub.

Lakin ən diqqətçəkən nailiyyət kişilərin fərdi yarışlarında qeydə alınıb. Oğlanlardan ibarət komandamız 2 qızıl, 4 gümüş və 4 bürünc medal qazanaraq bütün rəqiblərini geridə qoyub və Avropa Kubokunun birincisi olub.Berlin turniri göstərdi ki, Azərbaycan cüdosunda nəsil dəyişməsi prosesi uğurla davam edir. Gənclərin belə geniş coğrafiyalı və rəqabətli turnirdə liderlər sırasında yer alması, qarşıdan gələn Dünya Çempionatı və digər irimiqyaslı yarışlar üçün böyük ümidlər vəd edir. İdmançılarımızın final mərhələlərinə kütləvi şəkildə vəsiqə qazanması həm də onların taktiki hazırlığının yüksək səviyyədə olmasının göstəricisidir.