Premyer Liqanın XXIX turunda doğma meydanda “Şamaxı”ya 0:2 hesabı ilə məğlub olan “Kəpəz”in baş məşqçisi Azər Bağırov qarşılaşmadan sonra mətbuat konfransında iştirak edib.

Baş mütəxəssis məğlubiyyəti fərdi səhvlərlə əlaqələndirib: “Bu gün meydana yalnız qələbə üçün çıxmışdıq. Lakin bəsit diqqətsizlik ucbatından məğlub olduq. Rəqibi təbrik edirəm, ikinci hissədə bizdən daha üstün oyun nümayiş etdirdilər. Şakir Seyidovun top itkisindən sonra qol buraxdıq. Yarımmüdafiəçilərə hər zaman tapşırırıq ki, mərkəzdə xətasız oynamalıdırlar. Təəssüf ki, eyni səhvlər yenə təkrarlanır və nəticədə üzücü məğlubiyyətlər alırıq”.

Komanda daxilindəki ab-hava və rəhbərliklə münasibətlərə toxunan Bağırov, kifayət qədər emosional və mesaj xarakterli fikirlər səsləndirib: “Mən işimi vicdanla yerinə yetirməyə çalışıram. Kimin nə ilə məşğul olduğunu bilmirəm, amma gec-tez hər kəs əməllərinin cavabını alacaq. Mənim üçün Allahın şahidliyi kifayətdir.  Klub rəhbərliyinin dəstəyini hiss edirəm. Onlar komanda ilə bir yerdədirlər və futbolçulara lazımi motivasiyanı verirlər”.

Turnir cədvəlindəki vəziyyət və 11-ci yeri tutaraq I liqa təmsilçisi ilə pley-off oynamaq ehtimalı barədə danışarkən məşqçi nikbinliyini qoruyub: “Qabaqda hələ 4 tur var. Hazırda pley-off barədə düşünmək istəmirəm, diqqətimizi növbəti oyunlara yönəltmişik”.