Çərşənbə günü Çempionlar Liqasının 1/4 final mərhələsində “Bavariya”ya məğlub olaraq turnirlə vidalaşan “Real ” üçün mövsüm rəsmən uğursuzluqla yekunlaşmaq üzrədir. Madrid təmsilçisinin cari ili titulsuz başa vuracağı artıq demək olar ki, dəqiqləşib.

Hazırda komandaya Xabi Alonsonu əvəzləyən Alvaro Arbeloa rəhbərlik edir. Lakin uğursuz nəticələr rəhbərliyi hərəkətə keçməyə məcbur edib. Beynəlxalq media orqanlarının yaydığı məlumata görə, “Kral Klubu” artıq yeni mütəxəssis axtarışlarına başlayıb. Namizədlər arasında Maurisio Poçettino və Didye Deşam kimi simaların adı hallansa da, prezident Florentino Peresin əsas hədəfinin fərqli olduğu ortaya çıxıb.

“El Mundo” nəşrinin iddiasına görə, Peresin ilk seçimi “Real”a qızıl dövrünü yaşadan Zinedin Zidan olub. Lakin əfsanəvi fransızın Madridə qayıdışı qeyri-mümkündür. Səbəb isə Zidanın artıq gələcək karyerası ilə bağlı qəti qərarını verməsidir.

Mənbələr bildirir ki, Zidan Dünya Çempionatından sonra Fransa millisinin sükanı arxasına keçəcək. Didye Deşamın turnirdən sonra postunu tərk edəcəyi rəsmiləşdiyi üçün, fransız mediası Zidanın bu vəzifəyə gəlişini artıq bitmiş bir məsələ kimi təqdim edir.

Florentino Peresin siyahısında yer alan digər iddialı ad Yurgen Kloppdur. Lakin alman mütəxəssis yaxın gələcəkdə məşqçilik fəaliyyətinə qayıtmaq niyyətində olmadığını bildirib.

“Real” rəhbərliyi indi ciddi seçim qarşısındadır. Komandanı bu çətin durumdan çıxaracaq və azarkeşlərin etimadını qazanacaq növbəti “xilaskar”ın kim olacağı dünya futbol ictimaiyyətinin diqqət mərkəzindədir.