Yaponiya futbolunun canlı əfsanəsi Kazuyoşi Miura 59 yaşında növbəti dəfə adından söz etdirib.
Veteran hücumçu ölkə kuboku matçında doğma klubu “Fukuşima Yunayted”in qələbəsində mühüm pay sahibi olub. Miura 52-ci dəqiqədə hesabı 5:0-a çatdıran qola imza atıb. O, aşağı ötürməni bir toxunuşla dəqiq tamamlayıb və üç dəqiqə sonra əvəzlənib.
Bu, Miuranın 2022-ci ilin noyabrından bəri rəsmi oyunlarda vurduğu ilk qol olub.
Yaponiya millisinin sabiq üzvü peşəkar futbolçu kimi 42-ci mövsümünə hazırlaşır. Ötən ilin dekabrında “Fukuşima Yunayted”ə qoşulan təcrübəli futbolçu 2027-ci ilin sonunadək klubda icarə əsasında çıxış edəcək.
Xatırladaq ki, Miura Yaponiya millisinin heyətində keçirdiyi 89 oyunda 55 qol vurub. O, üç dəfə Yaponiya yüksək liqasının ən yaxşı futbolçusu seçilib, 1992-ci ildə isə Asiyanın ən yaxşı futbolçusu adına layiq görülüb.