Futzal üzrə millimiz Aktau şəhərində keçirilən yoldaşlıq görüşündə Qazaxıstan seçməsinə ağır hesabla (2:9) məğlub olub. Qarşılaşmadan sonra “milli”nin baş məşqçisi məğlubiyyətin səbəblərini açıqlayıb və komandadakı fundamental problemlərə toxunub.

Baş məşqçi ilk növbədə Aktaudakı möhtəşəm azarkeş dəstəyinin oyunun gedişatına təsir etdiyini vurğulayıb: “Belə bir atmosferdə oynamaq həqiqətən çətindir. Azarkeşlər arenanı tam doldurmuşdular və oyun boyu bir an belə dayanmadan komandalarını dəstəklədilər. Qazaxıstan yığmasında heyət baxımından müəyyən dəyişikliklər olsa da, onlar öz əsas “dördlük”lərini və oyun sistemlərini qoruya biliblər. Güclü və rəqabətli daxili çempionat sayəsində yeni oyunçular da bu sistemə sürətlə uyğunlaşırlar”.

Məşqçi komandamızın oyun quruculuğundakı çatışmazlıqlarını səmimi şəkildə etiraf edib. O bildirib ki, Gürcüstanla oyunlardan fərqli olaraq, bu dəfə təşəbbüs tamamilə rəqibin əlində olub: “Gürcüstanla görüşlərdə topa biz nəzarət edir, hücumlar qururduq. Lakin bu gün meydanda tam üstünlük rəqibdə idi. Qısa müddət ərzində ard–arda qollar buraxdıq. Çünki komandada çətin anlarda məsuliyyəti üzərinə götürəcək, oyunu öz arxasınca aparacaq bir lider yoxdur. Oyunçulara hər zaman soyuqqanlılığı qorumağı tapşırırıq. Lakin meydanda bunun tam əksini görürük. Bu, birbaşa psixoloji hazırlıqla bağlıdır”.Məğlubiyyətə baxmayaraq, baş məşqçi bu cür çətin sınaqların milli komanda üçün vacib təcrübə olduğunu qeyd edib: “Biz hələ ki, nə konkret bir sxem, nə də sistem formalaşdıra bilmişik. Qısa müddətdə dörd ağır oyun keçirmək fiziki və psixoloji baxımdan çətindir, lakin ‘milli’nin təcrübə qazanması və çatışmazlıqları görməyimiz üçün bu qarşılaşmalar çox faydalıdır”.