UEFA Çempionlar Liqasının II təsnifat mərhələsinin ilk oyununda Finlyandiyanın “KuPS” klubunu 1:0 hesabı ilə məğlub edən “Sabah”ın baş məşqçisi Valdas Dambrauskas matçsonrası mətbuat konfransında yurnalistlərin suallarını cavablandırıb.
Litvalı mütəxəssis ilk növbədə komandasını qələbə münasibətilə təbrik edərək böyük və möhtəşəm hisslər yaşadıqlarını bildirib. Bununla belə, o, yaradılan çoxsaylı qol epizodlarının boşa verilməsindən doğan müəyyən təəssüf hissini də gizlətməyib. Dambrauskas futbolçularının tapşırıqları düzgün yerinə yetirdiyini, hər iki hissədə kifayət qədər imkan əldə etdiklərini, lakin topun torla qovuşmadığını vurğulayıb. Matçın sonlarında rəqibin hesabı bərabərləşdirmək fürsətini əldən verdiyini və bu epizodda bəxtlərinin gətirdiyini etiraf edən baş məşqçi, artıq cavab oyununa köklənməli olduqlarını bildirib. O, Finlyandiyada süni örtüklü meydançada çətin matçın gözlənildiyini, lakin səfərdə qol imkanlarından maksimum yararlanacaqlarına inandığını diqqətə çatdırıb.
Aaron Maludanın heyətdə yer almamasına toxunan litvalı mütəxəssis, fransalı futbolçunun hazırda fiziki və mental cəhətdən oyuna hazır olmadığını, baş məşqçi kimi əsas vəzifəsinin isə ən yaxşı durumda olan oyunçuları seçmək olduğunu deyib. İkinci hissədə Ksander Seferina və Orfe Mbinanı meydana buraxaraq hücum xəttini gücləndirməyi hədəflədiklərini bildirən çalışdırıcı, əvəzlənən Aleksey İsayev və Kahim Perrisin də meydanda böyük enerji sərf edərək möhtəşəm oynadıqlarını əlavə edib.
Çoxsaylı imkanların boşa verilməsinin onu narahat etmədiyini vurğulayan Dambrauskas, əsas məsələnin epizod yaratmaq olduğunu qeyd edib. O, qolu “tortun üzərindəki albalı”ya bənzədərək, bəzən heç bir şans yaratmadan da nəticə qazanmağın mümkünlüyünə Dünya çempionatının finalını nümunə göstərib. Yeni transferlərin ehtiyatda qalmasını isə çempion heyətin daxilindəki mövcud anlaşma və yeni gələnlərin komandaya uyğunlaşma prosesinə ehtiyacı olması ilə əlaqələndirib. Baş məşqçi geniş və keyfiyyətli heyətə sahib olduqlarını, hər bir futbolçunun komandaya fayda verməyə qadir olduğunu xüsusi vurğulayıb.