“Neftçi”nin kapitanı Emin Mahmudov UEFA Konfrans Liqasının II təsnifat mərhələsində Belarusun Minsk “Dinamo”su ilə keçiriləcək ilk oyun öncəsi komandanın hədəfləri və qarşıdakı mövsümlə bağlı fikirlərini bölüşüb.
Təcrübəli yarımmüdafiəçi bildirib ki, klubun 90 illik yubileyi futbolçular üçün əlavə motivasiya mənbəyidir. Onun sözlərinə görə, “Neftçi”nin bütün diqqəti hazırda yalnız Minsk “Dinamo”su ilə qarşılaşmaya yönəlib və komanda hələ mümkün növbəti rəqib – Portuqaliyanın “Braqa” klubu barədə düşünmür: “Klubumuzun 90 illik yubileyi bizi daha da motivasiya edir. Qarşıda vacib mövsüm var. Hazırda Portuqaliya təmsilçisi haqqında düşünmürük. Bütün fikrimiz Minsk “Dinamo”su ilə oyundadır. Bu, gənc və yaxşı komandadır. Əvvəlcə onları mübarizədən kənarlaşdırmalıyıq, yalnız bundan sonra “Braqa” və əsas mərhələ barədə düşünə bilərik”.
Mahmudov əvvəlki illərdə komandanın avrokuboklarda yaxşı imkanlar əldə etdiyini, lakin müxtəlif səbəblərdən bundan yararlana bilmədiyini də xatırladıb. O, xüsusilə Vyana “Rapid”i ilə oyunda bəxt amilinin onların tərəfində olmadığını vurğulayıb və bu mövsüm daha uğurlu çıxış edəcəklərinə inandığını deyib: “Əvvəlki illərdə də növbəti mərhələyə yüksəlmək üçün yaxşı şanslarımız olmuşdu, amma alınmadı. “Rapid”lə oyunda bəxt bizim tərəfdə deyildi. Ondan əvvəl isə Rusiyanın “Arsenal” komandasını keçsək də, sonradan orta səviyyəli rəqibə uduzduq. İnanıram ki, bu mövsüm avrokuboklarda daha uğurlu çıxış edəcəyik”.
“Neftçi”nin son açıq məşqinə çoxsaylı azarkeşin qatılması da kapitanın diqqətindən yayınmayıb. O, tribunadakı dəstəyin futbolçular üçün əlavə stimul olduğunu vurğulayıb: “Məşqdə möhtəşəm ab-hava var idi. Azarkeşlərin dəstəyi bizi daha da motivasiya edir. Onları sevindirmək üçün əlimizdən gələni edəcəyik. Ümid edirəm ki, bunun öhdəsindən gələcəyik”.
Emin Mahmudovun açıqlamalarından görünür ki, “Neftçi” düşərgəsində əsas diqqət yalnız “Dinamo” ilə iki oyundan ibarət qarşıdurmaya yönəlib. Komanda mümkün növbəti rəqibləri deyil, ilk növbədə Belarus təmsilçisini mübarizədən kənarlaşdırmağı qarşısına əsas məqsəd qoyub.