Bakı Futbol Federasiyasının (BFF) təşkilatçılığı ilə “Sabahın Ulduzları” layihəsi çərçivəsində keçirilən məlumatlandırma sessiyası və imza mərasimində uşaq futbolunun inkişafı və gələcək strategiyalar müzakirə olunub. Tədbirdə AFFA-nın texniki direktoru Edmond Klaus və Azərbaycan millisinin baş məşqçisi Ayxan Abbasov mühüm açıqlamalarla çıxış ediblər.

AFFA-nın niderlandlı texniki direktoru Edmond Klaus qısa zamanda uğur qazanmağın qeyri-mümkün olduğunu vurğulayaraq, köklü islahatlara ehtiyac duyulduğunu bildirib: “İnkişaf üçün çox iş görməliyik. Uğur istəyiriksə, bir olmalıyıq. Hər kəs qısa zamanda nəticə gözləyir, lakin futbolda bu, mümkün deyil. Heç nəyi dəyişməsək, hazırkı vəziyyət olduğu kimi qalacaq. Davamlı uğur üçün rəqabət mühiti, məşqçi təhsili, istedadların axtarışı, klub idarəçiliyi və infrastruktur mütləq inkişaf etdirilməlidir. Məqsədimiz təkcə sabah uğur qazanmaq deyil, 5, 10, hətta 20 ildən sonra da uğurlu olmaq üçün möhkəm təməl qurmaqdır”.

Azərbaycanda futbolun böyük potensialı olduğunu qeyd edən mütəxəssis “Sabahın Ulduzları” layihəsinin əhəmiyyətinə toxunub. O, klubların uşaq futboluna daha çox diqqət ayırmalı olduğunu bildirib. Klaus həmçinin, Azərbaycana gəlməzdən əvvəl burada çalışmış niderlandlı mütəxəssislərlə (Stenli Brard, Con van Leon, Yan Versleyen) məsləhətləşdiyini və AFFA rəhbərliyi ilə baxışlarının tam üst-üstə düşdüyünü əlavə edib.

Mərasimdə çıxış edən Azərbaycan millisinin baş məşqçisi Ayxan Abbasov uşaq futbolundakı mövcud problemlərə və klubların məsuliyyətinə diqqət çəkib. O, bütün işi yalnız AFFA-dan gözləməyin yanlış yanaşma olduğunu vurğulayıb: “Deyirlər ki, AFFA futbolçu yetişdirməlidir. Bu fikir düzgün deyil, prosesdə klublar önə çıxmalıdır. Yerli mütəxəssislərimiz xarici klubların akademiyalarına təcrübə mübadiləsinə yollanmalıdırlar. Təbii ki, bunun üçün maliyyə vəsaiti də önəmlidir. Hazırda milliyə oyunçu seçməkdə çətinlik çəkirik. Məhz bu səbəbdən “Sabahın Ulduzları” kimi yarışların bölgələrdə də təşkili futbolumuz üçün çox faydalı olar”.