UEFA Çempionlar Liqasının II təsnifat mərhələsinin ilk oyununda Masazırda “Sabah”a 0:1 hesabı ilə məğlub olan Finlandiyanın KuPS klubunun baş məşqçisi Miika Nuutinen matçdan sonra keçirilən mətbuat konfransında fikirlərini bölüşüb.

Mütəxəssis ilk növbədə rəqibin üstün oyununu vurğulayaraq “Sabah”ı qələbə münasibətilə təbrik edib: “Rəqibi təbrik edirəm, yaxşı oyun nümayiş etdirdilər. Biz əsasən müdafiə olunmağa məcbur qaldıq. Bizi çox çətin qarşılaşmanın gözlədiyini bilirdik. “Sabah” davamlı hücumlar qururdu. Bununla belə, növbəti mərhələyə yüksəlmək şansımız hələ də qalır. Bir həftə sonra öz meydanımızda ən yaxşı oyunumuzu göstərərək bu imkandan yararlanmağa çalışacağıq“.

Ağır məğlubiyyətdən qaçmalarını şans amili ilə əlaqələndirən finlandiyalı çalışdırıcı “Sabah”ın hücumda çox təhlükəli epizodlar yaratdığını etiraf edib: “Böyük hesabla uduzmamağımızda bəxtimizin gətirdiyi fikri ilə razıyam. “Sabah” çoxlu qol epizodu yaratdı. Ancaq bizim üçün ən vacib məqam odur ki, cavab oyunu öncəsi növbəti mərhələyə yüksəlmək şansımızı qoruyub saxladıq”.

KuPS futbolçularının oyun ərzində vaxtı uzatması ilə bağlı səslənən tənqidlərə də toxunan Nuutinen bu iddiaları qəbul etməyib:

“Bununla razı deyiləm. Əlbəttə, 0:1 hesabı bizim üçün pis nəticə deyil. Amma vaxt uzatdığımız fikrini qətiyyən qəbul etmirəm.”

Komandasının hücum xəttində kəsərsiz görünməsinə toxunan baş məşqçi doğma azarkeşlər önündə keçiriləcək cavab matçı öncəsi ciddi təhlillər aparacaqlarını bildirib: “İlk oyunu ətraflı təhlil etməliyik. Heyətimizdə keyfiyyətli futbolçular var və onlar yaxşı nəticə uğrunda mübarizə aparmağa qadirdirlər”.