İngiltərə millisının və “Everton”un qapıçısı Cordan Pikfordun həyat yoldaşı Meqan Pikford sosial şəbəkədəki paylaşımı ilə böyük qalmaqalın mərkəzinə düşüb.

33 yaşlı Meqan İbitsaya səfər edərkən öz şəxsi təyyarəsində çəkdiyi “TikTok” videosunu izləyiciləri ilə bölüşüb. Təhlükəsizlik mövzusundan bəhs edən futbolçu xanımı qoruyucu kəmərini taxmağın vacibliyini vurğulayarkən gözlənilmədən mərhum Şahzadə Diananın adını çəkib: “Hər cür vəziyyətdə təhlükəsizlik kəmərini taxmağı sevirəm. Əgər bu bədbəxt hadisə Şahzadə Diananın başına gəlibsə, deməli, hər birimizin başına gələ bilər”.

1997-ci ildə Parisdə baş verən dəhşətli avtomobil qəzasında həyatını itirən Şahzadə Diananın belə qeyri-ciddi tonda xatırlanması sosial şəbəkə istifadəçilərinin kəskin etirazına səbəb olub. Şərhlərdə Meqanın bu müqayisəsi “yersiz”, “ehtiyatsız” və “reallıqdan uzaq” addım kimi qiymətləndirilib.

Şəbəkə istifadəçilərindən biri “Şahzadə Diananın adının belə asanlıqla çəkilməsi məni şoka saldı” deyə reaksiya veribsə, digəri “Düşünmədən danışan və hisslərə hörmət etməyən birinin növbəti addımı” ifadəsini işlədib.