“Sabah”ın polşalı yarımmüdafiəçisi Timoteuş Puxaç karyerası və gələcək planları barədə ölkəsinin “Meczyki” portalına müsahibə verib. Müqavilə ilə Almaniyanın “Holştayn” klubuna məxsus olan cinah oyunçusu “bayquşlar”ın heyətində qalmaq istədiyini və Bakıdakı mühitdən məmnunluğunu dilə gətirib.

Puxaç Almaniya klubu ilə müqavilə öhdəliklərinin olduğunu xatırladaraq, transfer prosesinin çətinliyindən bəhs edib: “Hazırda “Holştayn”la müqaviləm davam edir. Orada idman direktoru və baş məşqçi dəyişikliyi baş verib. Mənim buradakı uğurlu çıxışımı gördükdən sonra məni geri qaytarmaq niyyətindədirlər. Bu səbəbdən transfer prosesi bir qədər mürəkkəb keçə bilər, çünki almanlar “Sabah”dan transfer bəndində nəzərdə tutulan məbləğdən daha çox tələb edəcəklər”.

Buna baxmayaraq, futbolçu karyerasında sabitliyə ehtiyac duyduğunu vurğulayıb: “Özümü burada çox yaxşı hiss edirəm. Klubların necə razılığa gələcəyini zaman göstərəcək. Amma deyə bilərəm ki, növbəti mövsümdə də burada qalma ehtimalım təxminən 80 faizdir. Tez-tez klub dəyişmək inkişafıma həmişə müsbət təsir etmir, ona görə də sabitlik tərəfdarıyam. Gələn mövsüm avrokuboklarda mübarizə aparmağımız möhtəşəm olardı“.

Karyerasında “Trabzonspor”la Superliqanın qalibi olan Puxaç, Azərbaycandakı uğurlarını fərqli müstəvidə dəyərləndirib: “Türkiyəyə gedəndə komanda artıq çempionluğa tam hazır idi və biz ardıcıl 10 qələbə qazandıq. Orada da payım var idi, lakin “Sabah”da mən komandanın əsas aparıcı simalarından birinə çevrilmişəm. Məhz buna görə də Azərbaycanda qazanılan çempionluq mənə ruhən daha yaxın və doğmadır”.