Mövsümün sonunda “Real”da baş məşqçi dəyişikliyinin baş verəcəyi artıq rəsmiləşib. İspaniya mətbuatında Xabi Alonsonun istefasından sonra vakant qalan posta əsas namizəd kimi Joze Mourinyonun adı hallanır. Hər nə qədər Portuqaliya mütəxəssis bu xəbərləri təkzib etsə də, “AS” nəşrinin tanınmış jurnalisti Xose Feliks Dias tam fərqli məqamlara işıq tutub.

“Real” XXI əsrdəki ən bərbad mövsümlərindən birini yaşayır. Titulsuz başa vuran il, Xabi Alonsonun gedişi, komanda daxilindəki gərgin atmosfer və paltardəyişmə otağında baş verən dava klub rəhbərliyini radikal addımlar atmağa məcbur edib. Florentino Peresin planlaşdırdığı “böyük inqilab”ın siması isə məhz Joze Mourinyo ola bilər.

Hazırda Portuqaliyada çalışan Mourinyo “Bənfika” ilə oyundan əvvəl keçirilən mətbuat konfransında “Real” şayiələrinə belə reaksiya verib: “Daim “Real” haqqında danışırlar, amma mən bu mövzudan qaçıram. Klubla heç bir təmasım olmayıb. Xüsusən mövsümün final mərhələsində kimsə ilə danışıqlar aparmıram. “Eştoril”lə matça qədər bu mövzuda səbrsizlik nümayiş etdirə bilmərəm. Yalnız ondan sonra bir həftəlik boşluğum olacaq və hər kəslə danışa bilərəm. Görüşlər və tələblər barədə yayılan xəbərlər sadəcə spekulyasiyadır”.

Lakin “AS” jurnalisti iddia edir ki, vəziyyət Mourinyonun dediyindən daha ciddidir: “Mourinyo hər şeyi bilir. Bu mövsüm klubda baş verənlər, xüsusən son günlərin hadisələri barədə ona ətraflı məlumat verilib. Onun əlində hər bir futbolçu haqqında xüsusi hesabatlar var. Əgər portuqaliyalı təklifi qəbul edərsə, rəhbərlik bütün səlahiyyətləri ona verəcək. Florentino Peres komandanın idarəçiliyini yenidən ona etibar etmək niyyətindədir”.

Mourinyo hazırkı heyətin nüvəsinin qalacağını bilsə də, Madridə dönüşünü “son rəqs” kimi qiymətləndirmək üçün müəyyən şərtlər irəli sürüb. Təcrübəli mütəxəssis artıq gücləndirilməsi vacib olan mövqeləri və sxemləri müəyyənləşdirib. Əgər tərəflər razılığa gəlsə, “Santyaqo Bernabeu”da 13 ildən sonra “Special One” (Xüsusi biri) dövrü yenidən başlayacaq.