Premyer Liqanın IV turunda “Araz-Naxçıvan”ı 3:2 hesabı ilə üstələyən “Qarabağ”ın baş məşqçisi Qurban Qurbanov oyundan sonra keçirilən mətbuat konfransında jurnalistlərin suallarını cavablandırıb. Təcrübəli mütəxəssis gərgin keçən qarşılaşmanı dəyərləndirməklə yanaşı, müdafiədəki boşluqlara və qapıçı Mateuş Koxalskinin komandadan ayrılma ehtimalına da aydınlıq gətirib.

Qurbanov ilk növbədə futbolçularını təbrik edərək rəqibin müqavimətini yüksək qiymətləndirib: “Futbolçularımı təbrik edirəm, həqiqətən də çox gərgin oyun alındı. Qarşımızda yaxşı müdafiə olunan və cəld əks-hücumlar təşkil edən ciddi rəqib var idi. Eyni zamanda, 90 dəqiqə boyunca bizə dəstək olan azarkeşlərimizə minnətdarlığımı bildirirəm”.

Buraxılan iki qolun müdafiə xəttindəki narahatlıqdan xəbər verib-vermədiyi ilə bağlı sualı cavablandıran çalışdırıcı, əsas problemin diqqətsizlikdə olduğunu vurğulayıb: “Deməzdim ki, bu, müdafiədə ümumi narahatlığa əsas verir. Sadəcə, iki standart vəziyyətdə diqqətsizlik etdik. Əlbəttə, bu cür epizodlar çox təhlükəlidir. Bir oyunda iki dəfə standart vəziyyətdən qol buraxmaq bəlkə də məsuliyyətsizlikdir. Növbəti qarşılaşmalarda bu çatışmazlığı aradan qaldırmağa çalışacağıq”.

“Qarabağ”ın baş məşqçisi polşalı qapıçı Mateuş Koxalskinin mümkün gedişi ilə bağlı yayılan xəbərlərə də münasibət bildirib: “Hələ ki rəsmi gediş yoxdur, amma danışıqlar gedirdi. Müqaviləsində xüsusi bir bənd var və bu, bizi hər transfer pəncərəsində danışıqlar aparmağa vadar edir. Bu gün vacib matçımız var idi və bütün diqqətimizi oyuna yönəltmişdik. Məsələnin son durumu ilə oyundan sonra maraqlanacağam”.