Premyer Liqanın III turunda səfərdə “Kəpəz”ə minimal hesabla məğlub olan “Turan Tovuz”un baş məşqçisi Qurban Berdiyev matçdan sonra keçirilən mətbuat konfransında jurnalistlərin suallarını cavablandırıb.

Təcrübəli mütəxəssis yenilgiyə baxmayaraq, komandasının oyununda irəliləyiş hiss olunduğunu bildirib: “Səfərdəki əvvəlki matçla müqayisədə bu dəfə daha yaxşı futbol sərgilədik. Buna baxmayaraq, meydandan xalsız ayrıldıq. Rəqib əlinə düşən tək fürsətdən maksimum yararlanıb qol vurmağı bacardı. Biz isə çoxlu qol epizodu yaratsaq da, son zərbəni vurmaqda çətinlik çəkdik”.

Baş məşqçi komandadakı əsas çatışmazlığın hücum xətti ilə bağlı olduğunu gizlətməyib:“Məni ən çox narahat edən məqam hücum xəttimizdir. Dioqu Balau və İbrahima Vadjinin hələ tam optimal formada olmaması bizə müəyyən çətinliklər yaradır. Ümid edirəm ki, zamanla daha yaxşı oyun nümayiş etdirəcəyik.”

Mütəxəssis “Balau və Vadji ilə çempion olacağınıza ümid edirsinizmi?” sualına qısa və qətiyyətlə “əlbəttə” cavabını verib.

Triplardan yüksələn “istefa” şüarlarına toxunan Berdiyev buna sakit yanaşdığını qeyd edib: “Bu məqam məni heç də narahat etmir”.

Sonda çalışdırıcı Gəncədəki yeni idman qurğusu haqqında da müsbət fikirlərini bölüşüb: “Azərbaycanda belə müasir stadionların inşa olunmasına yalnız şad ola bilərəm”.