Azərbaycanın tanınmış kikboksçusu, ağır çəki dərəcəsində dünya reytinqlərini alt-üst edən Bəhram Rəcəbzadə (95 kq) növbəti böyük sınağına hazırlaşır. İdmançımız dünyanın ən nüfuzlu kikboks təşkilatlarından biri olan GLORY-nin Niderlandın Rotterdam şəhərində keçiriləcək Qran-pri turnirində iştirak edəcək.
8 güclü kikboksçunun mübarizə aparacağı Qran-pri turniri iyunun 13-də Niderlandın Rotterdam şəhərində reallaşacaq.
“Qızıl Canavar”ın ilk rəqibinin kimliyi hələlik rəsmən açıqlanmayıb. Lakin turnirin olduqca gərgin keçəcəyi indidən məlumdur, çünki qalib adı uğrunda Bəhramla yanaşı daha 7 seçmə döyüşçü rinqə çıxacaq.
Xatırladaq ki, Bəhram Rəcəbzadə öz aqressiv döyüş tərzi və sarsıdıcı zərbələri ilə son vaxtlar beynəlxalq arenada böyük səs küyə səbəb olub. Rotterdam turniri təmsilçimizin dünya çempionluğu yolunda növbəti həlledici addımı ola bilər.