Ölkəmizin 17 yaşadək futbolçulardan ibarət yığması Bakıda, Milli Komandaların Məşq Mərkəzində təlim-məşq toplanışına start verib. Aprelin 23-dək paytaxtda hazırlıq keçəcək komandamızın əsas hədəfi qarşıdakı beynəlxalq turnirə tam hazır vəziyyətdə yollanmaqdır.

AFFA-dan verilən məlumata görə, hazırlıq prosesinin Bakı mərhələsi başa çatdıqdan sonra Aqil Nəbiyevin yetirmələri Qazaxıstanın Şımkent şəhərinə yola düşəcək. Aprelin 24-dən mayın 1-nə kimi davam edəcək UEFA İnkişaf Turniri çərçivəsində millimiz üç rəqiblə qarşılaşacaq: Rusiya, Qazaxıstan və Pakistan.

Baş məşqçi Aqil Nəbiyev hazırlıq prosesinə 26 futbolçunu cəlb edib. Heyətin maraqlı məqamı isə xaricdə çıxış edən gənclərin sayının çox olmasıdır. Belə ki, ilkin heyətdə İspaniya klublarının şərəfini qoruyan 6, Serbiya klubunda çıxış edən isə 1 futbolçu yer alıb.Qeyd edək ki, Bakı toplanışından sonra baş məşqçi heyəti optimallaşdıracaq və Qazaxıstana yollanacaq heyətə 20 futbolçunun adı daxil ediləcək.