Premyer Liqanın XXIV turunda “Qəbələ”ni 3:1 hesabı ilə məğlub edən “Neftçi” tarixi göstəriciyə imza atıb. Paytaxt təmsilçisinin bu qarşılaşmada qazandığı penalti “ağ-qaralar”ın ölkə çempionatları tarihindəki 150-ci onbirmetrlik zərbəsi kimi qeydə alınıb.
Peşəkar Futbol Liqasının (PFL) rəsmi məlumatına əsasən, 1992-ci il mövsümündən bəri qazanılan bu zərbələrdən 120-si qolla nəticələnib. Bakı klubunun penalti yerinə yetirmə dəqiqliyi 80% təşkil edir. Xatırladaq ki, “Neftçi” penalti sayına görə yalnız “Qarabağ”dan geri qalır.
“Qəbələ” ilə matçdakı yubiley qolunun müəllifi komandanın kapitanı Emin Mahmudov olub. “Flaqman”ın ölkə çempionatındakı ilk penaltisi isə 8 may 1992-ci ilə təsadüf edir. Sumqayıt “Xəzər”i ilə keçirilən həmin görüşdə tarixi zərbəni Yunis Hüseynov dəqiq yerinə yetirib.