Qurban Qurbanovun start heyətində sürpriz olmadı. Yalnız zədəli Kadi Borxesin yerinə son oyunlarda özünü yaxşı tərəfdən göstərmiş Addai ilk dəqiqələrdən meydanda idi. “Napoli” isə meydana itkilərlə çıxmışdı. Lukaku və De Bröyne kimi aparıcı oyunçular zədə üzündən bu oyunda iştirak etmirdi.
“Qarabağ” ilk yarıda pas oynamaqda və hücum qurmaqda çətinlik çəkirdi. Bununla belə meydan sahibləri də hücumda kəsərli ola bilmirdi. 26-cı dəqiqədə Maktominey cərimə meydanında yıxılarkən baş məqşçi Konte qarışıq bütün Neapol penalti istəsə də, hakim epizoda yaxın idi və hətta VAR-a belə lüzum görmədi. Yalnız 35-ci dəqiqədə sol cinahdan asmanı Neres akrobatik tullanışla qapıya vurdu və Koxalski də eyni gözəlliklə tullanaraq topu çıxardı. Bundan başqa meydan sahibləri ilk yarıda real qol vəziyyəti yarada bilmədi və topa sahib olma faizi də demək olar bərabər idi. Odur ki, ilk hissəni “Qarabağ”ın aktivinə yazmaq olardı. Özü yaradıcı və mütəşəkkil oyun qura bilməsə də, rəqibə də kombinasiya qurmaq üçün genişlik vermədi.
İkinci hissənin əvvəlində hakim neapollulara şans verdi. Müdafizəmizin buraxdığı ara pasını qəbul edən Di Lorenso ilk öncə əli ilə Yankoviçə zərbə endirsə də, hakim məhz Yankoviçin cərimə meydanında qaydanı pozduğunu bildirdi və hətta VAR-a da müraziət etmədi. Lakin son sözü qapıçı Koxalski dedi. O, Heylundun penaltisini qaytarmağı bacardı. Bundan sonra “Napoli” təzyiqi artırdı və qapımız önündə təhlükəli vəziyyətlər bir-birini əvəz etdi. Koxalski azı 2 epizodda komandasını qoldan xilas etsə də, künc zərbəsi zamanı Mustafazadənin tərs vuruşunu düz Maktomineyin üstünə qaytardı. Şotland rahatca topu başla tora atdı. Bundan sonra da meydan sahibləri sakitləşmədi və 72-ci dəqiqədə hesabı artırdı. Bu dəfə Yankoviçə toxunan top Koxalskini aldatdı. İkinci qol faktiki olaraq hökmə bərabər idi. Oyuboyu rəqib qapısı önündə heç bir qol vəziyyəti yaratmayan və yalnız Addainin hər hissədə uzaqdan bir zərbəsi ilə yadda qalan qonaqların vəziyyəti dəyişəcəyi inandırıcı deyildi. Təəssüf ki, başından topla güclü zərbə alan Kevin Medinanın müdafiədəki yeri əvəzolunmazdır. Məhz onun meydanı tərk etməsindən sonra italyanlar qapımıza yol tapdılar.
“Napoli” – “Qarabağ” 2:0
“Napoli: Saviç Milinkoviç, Alllessando Buongiorno (Juan Jesus, 90), David Neres (Antonio Verqara, 90), Skot Maktominey, Amir Rraxmani, Matias Olivera, Rasmus Heylund (Lorentso Lukka, 75), Covanni Di Lorenso, Sem Baukema (Matteo Politano, 64), Stanislav Labotka, Noa Lanq (Elif Elmas, 75).
“Qarabağ: Mateuş Koxalski, Mateus Silva (Dani Bolt, 75), Kevin Medina (Sami Mmae, 61), Bəhlul Mustazadə, Elvin Cəfərquliyev (Toral Bayramov, 76), Pedro Bikalyo, Marko Yankoviç, Leandro Andrade (Aleksey Kaşuk, 61), Emmanuel Addai, Abdullah Zubir, Kamilo Duran (Nəriman Axundzadə, 76).
Qollar: Maktominey, 66 (1:0). Yankoviç, 72-avtoqol (2:0).