Çempionlar Liqasının 2025/26 mövsümünün yarımfinal mərhələsində gərginlik hələ start fiti səslənmədən pik həddə çatıb. “Bavariya” və PSJ arasındakı mübarizə meydandan kənara – komandaların qalacağı otel seçiminə keçib. Bayern & Germany nəşrinin yaydığı məlumata görə, Münhen klubu rəqibinə qarşı prinsipial mövqe nümayiş etdirərək onları planlarını dəyişməyə məcbur edib.

Parislilər Münhendəki məşhur “Infinity” otelini icarəyə götürmək istəyirdilər. Bu məkan Luis Enrikenin komandası üçün düşərli sayılırdı; ötən mövsüm “İnter”ə qarşı qələbə ilə başa çatan final matçından (5:0) əvvəl PSJ məhz burada məskunlaşmışdı. Lakin “Bavariya” rəhbərliyi yarımfinalın cavab oyunu öncəsi fransızların bu istəyinə “veto” qoyub.

“Alyans Arena”dan cəmi 20 km məsafədə yerləşən “Infinity” oteli uzun illərdir “Bavariya”nın ev oyunlarından əvvəlki ənənəvi bazası rolunu oynayır. Klub rəhbərliyi və baş məşqçi Vensan Kompani bu məsələdə güzəştə getməyəcəklərini kəskin şəkildə ifadə ediblər: “Bura bizim şəhərimizdir. Biz ‘Infinity’də qalırıq və doğma otelimizi heç kimə verməyəcəyik. Bu, bizim ev oyunumuzdur və qaydaları biz diktə edirik”.

Münhenlilərin bu “geosiyasi” gedişindən sonra PSJ təcili şəkildə alternativ axtarmalı olub. Paris təmsilçisi artıq yeni məkanını müəyyənləşdirib. Onlar “Alyans Arena”ya birbaşa çıxışı olan A9 avtomagistralının yaxınlığındakı “Andaz” otelində məskunlaşacaqlar.

Meydandakı böyük döyüşdən əvvəl baş tutan bu “otel qalmaqalı” tərəflər arasındakı rəqabəti daha da qızışdırıb. “Bavariya”nın bu addımı rəqibə qarşı ilk psixoloji üstünlük qazanmaq cəhdi kimi qiymətləndirilir.