“İnter”dəki çempionluq mövsümündə (2008/2009) Joze Mourinyo ilə Zlatan İbrahimoviç arasında yaşanan diqqətçəkən bir epizod “Netflix”in portuqaliyalı mütəxəssisə həsr olunmuş sənədli filmində üzə çıxıb.

A Seriyasının mövsüm üzrə ən yaxşı futbolçusu seçilən və “Atalanta” ilə matçın səhəri günü bu mükafatı almağa hazırlaşan isveçli hücumçu, oyunun ilk yarısındakı zəif çıxışına görə baş məşqçisinin sərt tənqidi ilə üzləşib.

Zlatan həmin anları belə xatırlayır: “Fasilədə Joze mənə yaxınlaşıb dedi: “Bu mükafatı alanda utanmalısan. Anana deməlisən ki, sən buna layiq deyilsən. İlk hissədəki oyunundan sonra sadəcə xəcalət çəkməlisən“. Bu sözlərdən sonra ikinci hissəyə inanılmaz hirs və motivasiya ilə çıxdım. Öz-özümə düşündüm: “İndi bu axmağa kim olduğumu göstərəcəyəm”.

Mourinyonun bu psixoloji həmləsi dərhal nəticə verib. Fasiləyə 2:2 hesabı ilə yollanan “İnter”də ikinci yarıda bir daha fərqlənən İbrahimoviç komandasına 4:3 hesablı çətin qələbə qazandırıb.

İsveçli ulduz portuqaliyalı mütəxəssisin liderlik keyfiyyətlərini həmişə yüksək qiymətləndirdiyini bildirib: “O, mənim daxili dünyama nüfuz etməyi və məni necə motivasiya edəcəyini mükəmməl bilirdi. Ona böyük hörmətim var”.

“İnter”də A Seriyası çempionluğu yaşayan və həmin mövsüm 25 qolla turnirin bombardiri olan İbrahimoviç, daha sonra Mourinyo ilə “Mançester Yunayted”də də bir araya gələrək Avropa Liqası və İngiltərə Liqa Kubokunu qazanıb.