Yaponiya futbolunun əfsanəsi Kazuyoşi Miura karyerasının növbəti inanılmaz nailiyyətinə imza atıb. “Kral Kazu” ləqəbli 59 yaşlı hücumçu ölkənin ən qədim turniri olan İmperator Kubokunda iki penaltini dəqiq yerinə yetirərək turnir tarixinin ən yaşlı qol müəllifi adını qazanıb.

Peşəkar karyerasında 42-ci mövsümünü keçirən əfsanəvi futbolçu üçüncü divizion təmsilçisi “Fukusima Yunayted”in aşağı liqa klubu “Oyama Sokker Klub”u 7:0 hesabı ilə darmadağın etdiyi matçın əsas qəhrəmanlarından biri olub.

Bu qarşılaşma Miuranın uzun müddət sonra bir oyundakı məhsuldarlığı ilə də yadda qalıb. Belə ki, o, sonuncu dəfə 2005-ci ilin noyabrında – Avstraliyanın “Sidney” klubunda çıxış edərkən bir matçda birdən çox qola imza atmışdı.

Kapitan sarğısı ilə sahəyə çıxan və 58 dəqiqə meydanda mübarizə aparan “Kral Kazu” əvvəlcə 12-ci dəqiqədə, daha sonra isə özünün qazandığı penaltini 55-ci dəqiqədəq dəqiq yerinə yetirərək dubl edib. Bununla da o, daha əvvəl 41 yaşında qol vuran sabiq yığma üzvü Sindzi Ononun rekordunu qırıb.

Matçdan sonra AFP agentliyinə açıqlama verən Miura hər gün məşqlərdən sonra xüsusi olaraq penaltilər üzərində çalışdığını bildirib.

Karyerasına 1986-cı ildə Braziliya “Santos”unda başlayan Miura uzun illər ərzində İtaliya, Xorvatiya, Avstraliya və Portuqaliya liqalarında da çıxış edib. Yaponiya millisinin heyətində 1990-cı ildə debüt edən hücumçu yığmada keçirdiyi 89 matçda 55 qol vurub. Miura yanvar ayından etibarən “Fukusima Yunayted”in uğurları üçün çalışır və hələ də yaşın sadəcə rəqəm olduğunu bütün dünyaya sübut etməkdə davam edir.