“Zirə”nin gürcüstanlı hücumçusu Davit Volkov Premyer Liqanın XXIX turunda “Turan-Tovuz”la keçirilən qarşılaşmada (1:1) karyerasının əlamətdar yubileylərindən birini qeyd edib.
PFL-in rəsmi məlumatına görə, təcrübəli forvard bu oyunda vurduğu qolla ölkə çempionatlarındakı qollarının sayını 60-a çatdırıb. Volkov bu göstəriciyə Azərbaycan Premyer Liqasında çıxdığı 198-ci matçda imza atıb.
Gürcüstanlı legioner ölkəmizdə çıxış etdiyi üç fərqli klubun heyətində qol sevinci yaşayıb:
“Zirə” – 108 oyun/37 qol
“Sabah” – 63 oyun/16 qol
“Qəbələ” – 27 oyun/7 qol
Bu qol sayəsində Davit Volkov Azərbaycan Premyer Liqası tarixində 60 və daha çox qol vuran 31-ci futbolçu kimi adını tarixə yazdırıb. Cari mövsümdə “Zirə”nin hücum xəttinin əsas siması olan Volkov, effektivliyi ilə seçilməyə davam edir.