“Barselona” yenidən İspaniya futbolunun zirvəsinə yüksəldi. Kataloniya təmsilçisi çempionatın bitməsinə dörd tur qalmış titulunu rəsmiləşdirərək əzəli rəqibi “Real”in bütün ümidlərini puça çıxardı. Bu zəfər klub üçün yalnız mənəvi deyil, həm də böyük maddi dividend deməkdir.

Kataloniyanın nüfuzlu “Sport” nəşrinin yaydığı məlumata görə, La Liqa çempionluğu “Barselona”ya ümumilikdə 150 milyon avroya yaxın gəlir gətirəcək. Bu məbləğə yayım hüquqları, idman bonusları və liqa klubları arasında bölüşdürülən digər vəsaitlər daxildir.

La Liqanın mükafat fondu üç əsas meyar əsasında formalaşır:

50% – bütün klublar arasında bərabər bölünür;

25% – idman nəticələrinə (turnir cədvəlindəki yerə) görə müəyyən edilir;

25% – klubların kommersiya potensialı və gəlir gətirmə qabiliyyətinə əsasən paylanır.

Təkcə yüksək idman nəticələrinə görə verilən bonusların 37,5 milyon avro civarında olduğu təxmin edilir. Bundan əlavə, klub İspaniya Superkubokundakı qələbə sayəsində artıq büdcəsinə 8 milyon avro əlavə edib.

Son illərdə ciddi maliyyə sıxıntıları ilə mübarizə aparan “Barselona” üçün bu vəsaitlər həyati əhəmiyyət kəsb edir. İspaniya mediası vurğulayır ki, çempionluq gəlirləri klubun büdcəsini stabilləşdirməyə və növbəti mövsüm öncəsi transfer planlarını daha rahat həyata keçirməyə imkan verəcək.

Bu zəfər “göy-qırmızılılar” üçün həm meydanda, həm də iqtisadi müstəvidə yeni bir dönəmin başlanğıcı ola bilər.