Viza problemləri səbəbindən Cənubi Afrika Respublikasının futbol üzrə milli komandası Dünya çempionatına yola düşərkən gözlənilməz gecikmə ilə üzləşib.
Əvvəlcə bazar gününə planlaşdırılan uçuş viza sənədlərindəki çatışmazlıqlar ucbatından bir gün sonraya təxirə salınıb. Komanda Meksikada yerli şəraitə adaptasiya olmaq və optimal hazırlıq keçmək üçün ilk matçdan 10 gün əvvəl ölkəyə çatmağı hədəfləyirdi.
Hadisə ölkə rəsmilərinin sərt reaksiyasına səbəb olub. İdman naziri Geyton Makkenzi viza prosesində yol verilən laqeydliyə və xidməti vəzifəyə səhlənkar yanaşmaya görə məsul şəxslərin cəzalandırılmasını tələb edib.Öz növbəsində, yerli futbol federasiyası rəsimləri yaranmış xoşagəlməz vəziyyətə görə ictimaiyyətdən üzr istəyib. Qurum baş verənləri araşdırmaq və gələcəkdə oxşar texniki problemlərin qarşısını almaq üçün xüsusi komissiya yaradıb.