AFFA Apellyasiya Arbitraj Tribunalının növbəti iclasında “Neftçi” klubunun Premyer Liqanın XXIII turunda baş vermiş hadisələrlə bağlı verdiyi apellyasiya şikayətinə baxılıb.

“Turan-Tovuz”la keçirilən qarşılaşmada “ağ-qaralar”ın azarkeşləri tərəfindən hakimlik korpusunun ünvanına kütləvi şəkildə təhqiramiz ifadələrin səsləndirilməsi səbəbindən kluba kəsilən 8000 manat məbləğində cərimə dəyişdirilmədən saxlanılıb. Tribunal paytaxt təmsilçisinin bu bənd üzrə şikayətini təmin etməyib.

Həmin oyunda nümayiş etdirilən təhqiramiz məzmunlu bannerə görə “Neftçi”yə kəsilən 15 000 manatlıq rekord cərimə ilə bağlı məsələ isə hələlik açıq qalır. Tribunal bu insidentlə bağlı əlavə sübutların toplanması və materialların daha dərindən araşdırılmasına ehtiyac duyulduğu üçün yekun qərarın çıxarılmasını təxirə salıb.

“Neftçi” rəhbərliyi cərimələrin ağırlığını əsas gətirərək sanksiyaların yüngülləşdirilməsini tələb edirdi.