“Qarabağ”ın vingeri Emmanuel Addai karyerasını İngiltərədə davam etdirə bilər. Qanalı futbolçunun “köhlən atlar”la müqavilə müddətinin başa çatması transfer bazarında rəqabəti qızışdırıb. Tanınmış insayder və jurnalist Alan Niksonun məlumatına görə, Çempionşip təmsilçiləri “Midlsbro” və “Hall Siti” 24 yaşlı vingeri yaxından izləyir. Hər iki klub gənc futbolçunu yay transfer pəncərəsi üçün əsas hədəflərdən biri kimi müəyyənləşdirib.

 Hazırda həm “Midlsbro”, həm də “Hall Siti” Premyer Liqaya vəsiqə qazanmaq üçün Çempionşipin pley-off mərhələsinə köklənib.  İngiltərə Premyer Liqasına vəsiqə uğrunda mübarizə aparan “Midlsbro”nu “Sauthempton”la, “Hall Siti”ni isə “Milluoll”la taleyüklü pley-off oyunları gözləyir.

Bu oyunların nəticəsi transferin maliyyə tərəfinə birbaşa təsir edəcək. Belə ki, komandalar elitaya yüksələ bilsələr, daha iddialı büdcə ilə Addai üçün mübarizə aparacaqlar. Əks halda, Çempionşipdə qalmaq transfer limitlərini məhdudlaşdıra bilər.

Emmanuel Addainin özü də karyerasını “dumanlı Albion”da davam etdirməkdə maraqlıdır. Lakin İngiltərə klubları bu yarışda tək deyil. İspaniyanın “Elçe” klubu da qanalı vingerin durumunu diqqətlə izləyir.

Müqaviləsinin müddəti bitmək üzrə olan Addai üçün bu yay karyerasında yeni bir səhifə açılacağı gözlənilir. “Qarabağ”ın bu transferdən gəlir əldə edib-etməyəcəyi və ya futbolçunun azad agent statusu ilə ayrılacağı yaxın vaxtlarda dəqiqləşəcək.