FİFA-nın sabiq prezidenti Zepp Blatter, ABŞ-da keçiriləcək mundial ətrafında yenidən qalmaqallı müzakirələrə rəvac verib. Blatter, isveçrəli hüquqşünas və korrupsiya üzrə ekspert Mark Pitin azarkeşlərə ünvanladığı “boykot” çağırışını açıq şəkildə dəstəklədiyini bəyan edib. O, ABŞ-da cərəyan edən siyasi hadisələrin futbol dünyasında ciddi narahatlıq doğurduğunu vurğulayıb.

Keçmiş FİFA rəhbəri bildirib ki, turnirin keçirilməsi artıq sual altına alınmalıdır. Özünün “X” sosial şəbəkə hesabında Mark Pitin sözlərindən sitat gətirən Blatter yazıb: “ABŞ-a getməyin, oyunlara televizordan baxın. Pit bu Dünya Çempionatını sorğulamaqda tamamilə haqlıdır.”

ABŞ, Kanada və Meksikanın birgə ev sahibliyi ilə 11 iyun – 19 iyul tarixlərində keçirilməsi planlaşdırılan turnir, xüsusilə ABŞ-dakı siyasi mühit səbəbindən tənqid hədəfinə çevrilib. Futbol ictimaiyyətini narahat edən əsas məqamlar bunlardır: Tramp administrasiyasının Qrenlandiya ilə bağlı iddiaları, miqrantlara qarşı tətbiq edilən sərt tədbirlər və səyahət qadağaları.

Bu amillər idmançılar, azarkeşlər və futbol rəsmiləri arasında təhlükəsizlik və iştirakla bağlı ciddi şübhələr yaradıb. Ekspertlər qeyd edirlər ki, mövcud siyasi kurs turnirin təşkilatçılığına və beynəlxalq nüfuzuna mənfi təsir göstərə bilər.