Kataloniya klubunun prezidentliyinə namizəd Mark Siriya seçkilərdə qalib gələcəyi təqdirdə Lionel Messini yenidən “Barselona”ya qaytarmaq üçün əlindən gələni edəcəyinə söz verib. “Goal” portalının yaydığı məlumata görə, Siriya bu barədə danışarkən: “Bizə Leo Messi lazımdır və onun geri dönüşü üçün mümkün olan hər şeyi edəcəyik”, — deyə bildirib.
Lakin namizəd Messinin kluba hansı statusda (futbolçu və ya rəsmi şəxs kimi) qayıdacağına aydınlıq gətirməyib. Xatırladaq ki, argentinalı ulduz bu payızda “İnter Mayami” ilə müqaviləsini 2028-ci ilin sonuna qədər uzadıb. Messi “Barselona”nı 2021-ci ilin yayında klubun maliyyə problemləri səbəbindən müqaviləni yeniləyə bilməməsi nəticəsində gözlənilməz şəkildə tərk etmişdi.