Danimarkanın “Orxus” klubunun baş məşqçisi Yakob Poulsen UEFA Çempionlar Liqasının III təsnifat mərhələsinin cavab matçında Masazırda “Sabah”a qarşı məruz qaldıqları 0:4 hesablı darmadağını (ilk oyun – 2:1) şərh edib.

Mətbuat konfransında çıxış edən danimarkalı mütəxəssis məğlubiyyətin əsas səbəbi kimi komandasının müdafiədəki bağışlanılmaz səhvlərini göstərib və Bakı təmsilçisinin layiqli qələbə qazandığını etiraf edib.

Oyunun, xüsusilə də qolların vurulduğu ikinci hissənin ssenarisini dəyərləndirən Poulsen, hadisələrin bu cür cərəyan edəcəyini gözləmədiklərini bildirib: “Təbii ki, bir hissədə dörd qol buraxacağımızı gözləmirdik. Öz səhvlərimiz ucbatından belə məğlub olduq. Kobud xətalara yol verdik və rəqibə topa sahib olmaq imkanı yaratdıq. “Sabah” kimi komandaya belə şans versəniz, sizi mütləq cəzalandıracaq. Əslində biz topa nəzarət etmək istəyirdik, lakin üstünlük rəqibə keçdi və onlar təzyiqi saniyəbəsaniyə artırdılar. Müdafiədəki yolverilməz səhvlərimiz böyük hesablı məğlubiyyəti qaçılmaz etdi”.

“Sabah”ın pley-off mərhələsinə vəsiqə qazanmağa tam layiq olduğunu vurğulayan baş məşqçi, rəqibin fərdi keyfiyyətlərinə də diqqət çəkib. O, rəqib heyətdən xüsusi olaraq bir futbolçunu fərqləndirib: “İki oyunun nəticəsinə və ümumi mənzərəyə baxsaq, “Sabah” çox yaxşı oyun nümayiş etdirdi və növbəti mərhələni haqq etdiyini sübuta yetirdi. Onların heyətində olduqca keyfiyyətli futbolçular var, xüsusən də hücum xəttində çox effektivdirlər. “Sabah”dan kimi öz komandamda görmək istədiyimə gəlincə, İvan Lepinyitsanın adını qeyd edərdim”.

Çempionlar Liqası ilə vidalaşan “Orxus” mübarizəsini UEFA Avropa Liqasında davam etdirəcək. Poulsen, bu turnirdəki böyük ehtimalla potensial rəqibləri olacaq Portuqaliya nəhəngi “Benfika” barədə suala qısaca münasibət bildirib: “Avropa Liqasında püşk bizim üçün çətin oldu. Lakin hazırda bütün diqqətimiz qarşıdakı çempionat oyununa yönəlib. Yalnız həmin matçdan sonra “Benfika” haqqında düşünməyə başlayacağıq”.