DÇ-2026-nın bürünc medal uğrunda keçiriləcək İngiltərə ilə qarşılaşması Didye Deşam üçün Fransa millisinin sükanı arxasında sonuncu oyun olacaq. 14 illik epoxanın bitdiyini turnirdən öncə elan edən 57 yaşlı mütəxəssisin son qızıl medal arzusu yarımfinalda İspaniyaya 0:2 hesablı məğlubiyyətlə puç oldu.

Bu tarixi vida ərəfəsində “X” platformasında emosional paylaşım edən Fransa yığmasının kapitanı Kilian Mbappe baş məşqçisi ilə belə vidalaşıb: “Bu gün sizin son rəqsinizdir. Bizə bu qədər çox şey qazandıran bir insana daha layiqli bir final bəxş etməli idik, təəssüf ki, bacarmadıq. Son 14 ildə bizim üçün etdiklərinizi sözlərlə anlatmaq çətindir. Siz bu komandanın yenidən doğulmasının əsas hərəkətverici qüvvəsi oldunuz. İnsanlar böyüklüyünüzü hər zaman layiqincə qiymətləndirməsə də, zaman və tarix bunu mütləq təsdiqləyəcək…”.

Deşamın Fransa futbolundakı mirası həqiqətən də unikaldır. O, Mario Zaqallo və Frans Bekkenbauerlə yanaşı, dünya çempionluğunu həm futbolçu (1998), həm də baş məşqçi (2018) kimi qazanan cəmi üç əfsanədən biridir. Onun rəhbərliyi altında fransızlar 2022-ci ildə dünya çempionatının gümüş medallarına da sahib çıxıblar.

Mbappe paylaşımını bu sözlərlə tamamlayıb: “Ölkəmizin ən böyük əfsanələrindən birinin yanında olmaq mənim üçün böyük şərəf idi. Birlikdə yaşadıqlarımız və nail olduqlarımız ağlımda ən gözəl xatirələr kimi qalacaq”. Ulduz hücumçu Deşama millidəki xidmətlərinə görə təşəkkür edərək, gələcək karyerasında uğurlar arzulayıb.