Avropa Futbol Assosiasiyaları İttifaqı (UEFA) VAR texnologiyasının tətbiqi ilə bağlı yeni qaydaları qəbul etməkdən imtina edir. FİFA-nın mundialda sınaqdan keçirdiyi və futbolçuların simulyasiya (hakimi aldatma) cəhdlərinə görə cəzalandırılmasını nəzərdə tutan VAR müdaxiləsi, beynəlxalq turnirlərlə Avropa kubokları arasında ciddi qayda ziddiyyəti yaradıb.
Dünya Çempionatında yaşanan qalmaqallardan sonra Futbol Assosiasiyalarının Beynəlxalq Şurası (IFAB) VAR-ın səlahiyyətlərini genişləndirdi. Yeni qaydaya əsasən, video köməkçi hakimlər simulyasiya hallarını qeydə alaraq baş hakimin ilkin qərarını ləğv edə və qaydanı pozan deyil, hakimi aldatmağa çalışan oyunçunun cəzalandırılmasını tələb edə bilər. Turnir zamanı iki futbolçunun məhz bu səbəbdən ikinci sarı vərəqə ilə meydandan qovulması müzakirələri alovlandırıb.
Bu qaydanın tətbiq olunduğu ilk insident ev sahibi ABŞ ilə oyunun startında yaşandı. Niderlandlı referei Denni Makkeli VAR-ın xəbərdarlığından sonra Tim Rimin sarı vərəqəsini ləğv etdi, imitasiya ilə penalti qazanmağa çalışan paraqvaylı Migel Almironu isə ikinci sarı vərəqə ilə meydandan qovdu. Oxşar hadisə pley-off mərhələsinin İsveçrə – Argentina matçında da təkrarlandı: hakim Leandro Paredesə verdiyi xəbərdarlığı geri götürdü, simulyasiya edən Bril Embolo isə ikinci xəbərdarlıqla komandasını taleyüklü anda azlıqda qoydu.
FİFA və IFAB bu dəyişikliyi rəsmən dəstəkləsə də, UEFA öz turnirlərində bu yeniliyə qapını bağlayıb. Avropa futbol qurumunun qaydalarına görə, VAR simulyasiya bəhanəsi ilə baş hakimin qərarına müdaxilə edə bilməz. Bu isə o deməkdir ki, analoji qayda pozuntuları Çempionlar Liqası və digər UEFA turnirlərində fərqli idarə olunacaq. Tənqidçilər bəyan edirlər ki, VAR-ın səhv qərarları düzəltmək imkanlarının yalnız simulyasiya ilə məhdudlaşdırılması məntiqsizdir. Texnologiya pozuntunun xarakterindən asılı olmayaraq, qaydanı pozan oyunçunun şəxsiyyətinin müəyyənləşdirilməsində eyni dərəcədə effektiv olmalıdır. UEFA da FİFA-nın bu addımının ədalət prinsiplərinə tam cavab vermədiyini düşünür və bu şübhələri bölüşür.