DÇ-2026-ya Küraçao üzərində 7:1 hesablı darmadağınla başlayan Almaniya, qrup mərhələsinin ikinci turunda Kot-d’İvuarla üz-üzə gəldi. Afrika təmsilçisi ilk oyunda Ekvadoru minimal hesabla (1:0) məğlub etdiyi üçün bu qarşılaşma hər iki komanda üçün liderlik uğrunda prinsipial əhəmiyyət kəsb edirdi.
Matça ərazi üstünlüyü ilə başlayan almanlar ilk təhlükəli epizodu 10-cu dəqiqədə yaratdılar. Yozua Kimmixin sağ cinahdan ötürdüyü topu Kai Haverts başla qapıya göndərsə də, rəqib qapıçı Yahya Fofana qola icazə vermədi.
Hissənin ortalarında Aleksandar Pavloviç künc zərbəsindən sonra topu tora daxil etsə də, qarşılaşmanın baş hakimi qapıçıya qarşı qayda pozuntusu əsas gətirərək qolu qeydə almadı. Bu epizodun ardınca isə afrikalılar hesabı açmağı bacardılar. Diallonun zərbəsindən sonra müdafiədən qayıdan topa hamıdan tez reaksiya verən Frank Kessye, cinahdan gələn ötürməni dəqiq zərbəylə tora qovuşdurdu. “Bundestim” fasiləyə qədər cavab qolu üçün rəqib qapısına yüklənsə də, hücumları nəticə vermədi.
İkinci hissənin əvvəlində Kot-d’İvuar Kessye və Ulainin ifasında təhlükəli əks-hücumlarla fərqi artırmağa yaxın olsa da, Almaniya müdafiəsi təhlükəni sovuşdurmağı bacardı. Bundan sonra təşəbbüsü tamamilə ələ alan Yulian Naqelsmanın yetirmələri hücum xəttində dəyişikliklərə əl atdılar və bu gedişlər öz bəhrəsini verdi. Oyuna sonradan daxil olan Nadiem Amirinin sağ cinahdan asmasını “ənənəvi ehtiyat oyunçu” Deniz Undav qola çevirərək tarazlığı bərpa etdi.
Matçın son dəqiqələrində Kot-d’İvuarın heyətində Simon Adingra hesabı komandasının xeyrinə dəyişmək üçün ideal şansı boşa verdi. Futbolun yazılmamış qanunu olan “vurmayana vurarlar” prinsipi özünü çox gözlətmədi.
Uzatma dəqiqələrində Fofananın ardıcıl seyvlərinə baxmayaraq, Almaniya təzyiqi dayandırmadı. Feliks Nmeçanın incə və mükəmməl ötürməsindən sonra Deniz Undav dublunu rəsmiləşdirərək almanlara dramatik və vacib qələbəni qazandırdı.
Dünya kuboku. E qrupu, 2-ci tur
Almaniya – Kot-d’İvuar – 2:1
Qollar: Undav, 68, 90+4 – Kessye, 30.
Baş hakim: Xuan Qabriel Benites (Paraqvay)
Almaniya: Noyer, Kimmix, Ta, Şlotterbek (Rüdiger, 46), Braun, Pavloviç (Amiri, 70), Nmeça, Sane (Levelinq, 60), Musiala (Undav, 60), Virts, Haverts (Qoretska, 85).
Kot-d’İvuar: Ya. Fofana, Sinqo (Due, 82), Kossunu, Aqbadu, Konan, Diallo (Adinqra, 75), Kessye, Sanqare (S. Fofana, 75), Ya. Diomande (Pepe, 82), Bonni (Gessan, 75), Ulai.
Stadion: “BMO Fild” (Toronto, Kanada)