“Zirə” ilə keçirilən yoxlama matçını (4:3) dəyərləndirən “Qarabağ”ın baş məşqçisi Qurban Qurbanov ilk hazırlıq mərhələsinin gedişatından və futbolçuların məsuliyyətindən razı qaldığını bildirib. Oyunçuların düşərgəyə fərqli vaxtlarda qoşulması səbəbindən fiziki hazırlıqda müəyyən disbalansın yarandığını qeyd edən mütəxəssis, bunun ilkin dövr üçün normal olduğunu vurğulayıb.

Heyətin tədricən yeniləndiyini və şans verilən yeni transferlərin zamanla komandaya uyğunlaşaraq daha faydalı olacaqlarına inandığını deyən baş məşqçi, bu prosesin daha sürətli getməsini istədiyini gizlətməyib. Hazırda bir neçə mövqeni gücləndirmək üçün ciddi transfer işlərinin aparıldığını bildirən Qurbanov, heyətə yeni qoşulacaq futbolçuların olacağı kimi, komandadan gedişlərin də mümkün olduğunu diqqətə çatdırıb.

Mövsümün planlarından da söz açan təcrübəli mütəxəssis ilk rəsmi matça qədər optimal formaya düşməyə çalışacaqlarını bəyan edib. Yeni komanda formalaşdırdıqları üçün müəyyən çatışmazlıqların qaçılmaz olduğunu və buna hazırlıqlı olduqlarını deyən Qurbanov, “Qarabağ”ın cari mövsümdəki əsas hədəfinin Avropa Liqasının əsas mərhələsinə vəsiqə qazanmaq olduğunu vurğulayıb.