Meksika yığması mundialın pley-off mərhələsinə vəsiqəni təmin edən ilk komanda oldu. Xavyer Aqirrenin yetirmələri Cənubi Koreya üzərində minimal hesabla qələbə qazansa da, nümayiş etdirilən oyun azarkeşləri tam qane etməyib. Ancaq hazırda dünya mediası komandanın oyunundan daha çox, tribunadakı bir azarkeşini müzakirə edir. Həmin xanımın DÇ-2022-nin ulduzu İvana Knollun uğrunu təkrarlayacağı gözlənilir.

Meksikanın ən tanınmış idman influenserlərindən olan Fraydey Frida millinin oyununu tribunadan izləyib. Onun fərqli geyimi dərhal yayım operatorlarının diqqətini çəkib. Cənubi Koreya ilə matç zamanı rejissorlar kameranı dəfələrlə Frida tərəfə yönəldiblər və o, qısa müddətdə sosial şəbəkələrdə fırtına qoparıb.

Modelin əynində Meksikanın milli rənglərini və ənənəvi motivlərini əks etdirən dar korset, dizdən yuxarı uzun çəkmələr və uzun əlcəklər olub. O, əlindəki Meksika bayrağı ilə bəzən bədəninin açıq hissələrini örtməyə çalışıb.

Futbol mövzulu paylaşımları ilə öz brendini quran Frida, matçdan sonra emosiyalarını bu sözlərlə ifadə edib: “Bu gecə baş verənlər tam bir çılğınlıq idi və bu anlar ürəyimdə əbədi qalacaq. Bütöv bir ölkəni eyni ehtiras ətrafında birləşmiş görmək insana inanılmaz eyforiya, həyəcan və xoşbəxtlik bəxş edir”.

Şübhəsiz ki, meksikalı influenser Qətərdəki dünya çempionatında xorvatiyalı İvana Knollun qazandığı qlobal populyarlığı təkrarlamaq niyyətindədir. Yeri gəlmişkən, Knoll özü də builki mundialda Xorvatiya millisini dəstəkləmək üçün tribunadadır və onun geyim tərzi yenidən müzakirə mövzusuna çevrilib.