Futbol dünyasının böyük maraqla gözlənilən turniri – Dünya Çempionatı start götürdü! Son dörd ilin ən mühüm idman hadisəsinin təntənəli açılış mərasimi əfsanəvi “Atsteka” stadionunda baş tutdu.

Turnirin tarixdə ilk dəfə olaraq üç fərqli ev sahibi ölkədə – üç ayrıca açılış mərasimi ilə keçiriləcəyi öncədən elan olunmuşdu. Bu seriyanın ilki Mexikoda, çempionatın ilk matçından dərhal əvvəl reallaşdı.

Təşkilatçıların hazırladığı proqram rəngarəng musiqili çıxışlar və heyranedici vizual effektlərlə yadda qaldı. Yaşıl meydanın mərkəzində nəhəng Dünya Kubokunun maketi ucaldıldı, azarkeşlər isə xüsusi müraciətlə salamlandı: “Meksika sizi qəlbinin dərinliklərindən gələn təbəssümlə qarşılayır. Biz böyük ruh sahibiyik. Futbol nəsilləri və bütün dünyanı birləşdirən ortaq ehtirasdır”.

Mərasimin musiqi hissəsində sahnəyə çıxan Belinda, Denni Ouşen və “Mana” qrupu tribunalarda böyük coşğu yaratdı.

Gecənin kulminasiya nöqtəsi isə dünyaşöhrətli Şakiranın səhnəyə çıxışı oldu. Kolumbiyalı ulduz özünəməxsus rəqsləri ilə stadionu heyran etdi. O, nigeriyalı ifaçı Burna Boy ilə birlikdə turnirin rəsmi himni olan “Dai Dai” hitini canlı səsləndirərək azarkeşlərə unudulmaz anlar yaşatdı. Bu möhtəşəm şou Meksikadakı açılışın ilk hissəsinə rəngarəng pirotexniki atəşfəşanlıqla nöqtə qoydu.

Mərasimin yekun hissəsində iştirakçı ölkələrin bayraqdarları meydana daxil oldu. Dünya xəritəsini xatırladan mərkəzi dairədə dalğalanan bayraqlar vizual ziyafət yaratdı. Turnirin ev sahiblərinə xüsusi mükafatların təqdim olunmasından sonra səhnəyə çıxan dünyaşöhrətli tenor Andrea Boçelli və cənubi koreyalı-amerikalı sənətçi Edjae ecazkar ifaları ilə gecəni yekunlaşdırdılar.