Avropanın ən nüfuzlu klub turnirində ilk finalçının adına bu axşam Londonda aydınlıq gələcək. “Arsenal” doğma divarlar arasında Madridin “Atletiko” klubunu sınağa çəkəcək. İspaniya paytaxtındakı ilk qarşılaşmada qeydə alınan 1:1 hesablı heç-heçə bütün sualların cavabını “Emireyts” stadionuna saxlayıb.
“Arsenal”ın baş məşqçisi Mikel Arteta komandadakı əhval-ruhiyyənin pik həddə olduğunu vurğulayıb. London təmsilçisinin sonuncu dəfə düz 20 il əvvəl Çempionlar Liqasının finalında oynadığını xatırladan ispan mütəxəssis, azarkeş amilinin həlledici olacağına inandığını deyib: “20 ildən sonra yenidən bu səviyyəyə yüksəlmək üçün klub və komanda olaraq böyük fədakarlıqlar etmişik. Arenada inanılmaz bir enerji hiss edirəm. Azarkeşlərimizin dəstəyi ilə istədiyimiz futbolu sərgiləyib, adımızı finala yazdırmaq istəyirik”.
Londonlular üçün ən sevindirici xəbər isə zədəsini sağaldan Kay Haverts və kapitan Martin Edeqorun matça tam hazır olmasıdır. Artetanın da qeyd etdiyi kimi, heyətdəki bu “taktiki zənginlik” həlledici gecədə “Arsenal”ın ən güclü silahına çevrilə bilər.
“Atletiko”nun xarizmatik çalışdırıcısı Dieqo Simeone isə oyundan öncəki ənənəvi mətbuat konfransında yenə də öz ampluasında olub. Komandanın otel seçimi ilə bağlı suala “Burada heç bir xurafat yoxdur, sadəcə qiymətlər daha ucuzdur” deyərək gülümsəyən argentinalı mütəxəssis, əslində onları nə qədər çətin 90 dəqiqənin gözlədiyinin fərqindədir. Qrup mərhələsində “Arsenal”a 0:4 hesabı ilə ağır məğlub olan “matrasçılar”, bu dəfə eyni kabusu təkrarlamamaq və Londondan final bileti ilə qayıtmaq niyyətindədir.
UEFA Çempionlar Liqası, 1/2 final (cavab oyunu)
“Arsenal” (İngiltərə) – “Atletiko” (İspaniya)
Tarix: 5 may
Saat: 23:00
Məkan: “Emireyts” stadionu, London
Baş hakim: Daniel Zibert (Almaniya)
İlk oyun: 1:1
Canlı yayım: İctimai TV, TRT 1
Show quoted text