“Qarabağ”ın xorvatiyalı qolkiperi Fabiyan Buntiç karyerasını Çexiya çempionatında davam etdirə bilər. 29 yaşlı qapıçı ilə Çexiya elitasının təmsilçisi “Siqma” yaxından maraqlanır.

Olomouts şəhərini təmsil edən eyniadlı klub, təcrübəli əlcək sahibini artıq bu yay heyətinə qatmaq niyyətindədir. Lakin hazırda tərəflər arasında rəsmi razılığın əldə olunmasına mane olan ciddi bir məqam var. Belə ki, “Siqma”nın təklif etdiyi illik maaşın Buntiç üçün qaneedici olmadığı bildirilir.

Maliyyə şərtləri ilə bağlı ortaq məxrəcə gəlinməsə, xorvatiyalı qapıçı karyerasını Ağdam klubunda davam etdirəcək. Xatırladaq ki, Buntiçin “Köhlən atlar”la 2026/27 mövsümünün sonuna qədər qüvvədə olan müqaviləsi var.

Qeyd edək ki, qapıçı bu mövsüm “Qarabağ”ın heyətində həm daxili çempionatda, həm də avrokuboklarda inamlı çıxışı ilə diqqət çəkib. O, son olaraq Azərbaycan Kubokunun yarımfinalında “Sabah”la matçda qırmızı vərəqə alan Mateuş Koxalskini əvəzləyərək meydanda yer alıb. Hazırda transfer prosesinin necə yekunlaşacağı hər iki tərəfin növbəti addımlarından asılıdır.