Braziliya futbolunun ulduzu Neymar ilə doğma klubu “Santos”un azarkeşləri arasında münasibətlər qırılma nöqtəsinə gəlib. Klubun dərinləşən böhranı fonunda tərəflər artıq emosiyalarını cilovlaya bilmirlər.

Bir vaxtlar Braziliya futbolunun flaqmanı olan “Santos” hazırda tarixinin ən ağır günlərini yaşayır. Turnir cədvəlində 15-ci pilləyə qədər geriləyən komandada gərginlik hər keçən gün artır. “Fluminense”yə qarşı alınan 3:2 hesablı son məğlubiyyət isə səbr kasasını daşıran son damla olub.

Matçın final fiti ilə birlikdə tribunalar futbolçuları ağır təhqirlər və fit sədaları ilə “yola salıb”. Təzyiqdən yayınmağa çalışan Neymarın nümayişkaranə şəkildə qulaqlarını yumması azarkeşlərin qəzəbini daha da alovlandırıb. Sosial mediada ulduz futbolçunun bu davranışı “hörmətsizlik” kimi qiymətləndirilərək kəskin tənqid hədəfinə çevrilib.

Tənqidlərin ardı-arası kəsilməyincə Neymar susqunluğunu pozaraq sosial media hesabından çox sərt və aqressiv bir bəyanat yayıb:

“Nə qulaq qapamaqdan danışırsınız? Məgər mən bədənimi də qaşıya bilmərəm? Buradan boş-boşuna dram çıxarmayın. Hamınız cəhənnəm olun!”

Bu, Neymarın “Santos” tərəfdarları ilə ilk qarşıdurması deyil. Bir neçə gün əvvəl “Rekoleta” ilə bərabərlikdən sonra yaşanan mübahisə və fanatların məşq mərkəzinə basqın etməsi klub daxilindəki xaosun göstəricisidir.

Hazırda həm klubun vəziyyəti, həm də Neymarın formadan düşməsi futbolçunun milli komandadakı gələcəyini də sual altına qoyur. Qarşıdan gələn Dünya Çempionatına Neymarın çağırılıb-çağırılmayacağı Braziliya idman mətbuatının əsas müzakirə mövzusuna çevrilib.