Premyer Liqanın 23-cü turu çərçivəsində keçirilən “Kəpəz” – “Zirə” matçından (2:2) sonra qonaqların baş məşqçisi Rəşad Sadıqov mətbuat konfransında oyunun gedişatını və turnir cədvəlindəki rəqabəti şərh edib.

Qarşılaşmaya erkən qolla başladıqlarını vurğulayan mütəxəssis, əldə olunan üstünlüyü qoruya bilməmələrinin səbəbini diqqətsizliklə əlaqələndirib: “Oyuna yaxşı başladıq və erkən qol vurduq. Hesabı artırmaq üçün kifayət qədər imkanlarımız olsa da, bunlardan yararlana bilmədik. Rəqib isə standart vəziyyətdən maksimum istifadə etdi. İkinci hissəyə də aktiv başladıq, lakin yenə standart vəziyyətdən sonra qapımızda qol gördük. Belə nəticə fonunda topa nəzarəti ələ almağımız təbii idi. Matçın sonunda biz də standart vəziyyətdən tarazlığı bərpa etdik. Mövsüm ərzində belə oyunlar olur – çoxsaylı epizodlar yaratsan da, rəqib standartlardan qollar vurur. Baxmayaraq ki, oyundan əvvəl bu barədə xəbərdarlıq etmişdik. Çempionatımızda belə qollara tez-tez rast gəlinir. Çətinliklərə rəğmən, səfərdə qazanılan bir xal müsbət nəticədir”.Rəşad Sadıqov çempionatdakı rəqabətə toxunaraq, iddialı klublar arasındakı maraqlı statistik məqamı da qeyd edib: “Hazırda iki komanda çempionluq, beş klub isə avrokuboklara vəsiqə uğrunda gərgin mübarizə aparır. Maraqlıdır ki, həmin beş klubun baş məşqçiləri arasında yeganə yerli mütəxəssis mənəm. Digər dörd rəqibimiz isə tanınmış əcnəbi məşqçilərdir”.