UEFA Konfrans Liqasının I təsnifat mərhələsinə hazırlaşan “Zirə” növbəti mövsüm üçün planlarını açıqlayıb.
Klubun mətbuat xidmətindən verilən məlumata görə, baş məşqçi Rəşad Sadıqovun komandası hazırlıqların ilk mərhələsini Bakıda keçirəcək. İyunun 25-nə qədər paytaxtda məşq edəcək “qartallar” bu müddətdə bir yoxlama oyununda qüvvəsini sınayacaq. “Zirə” iyunun 20-də, saat 18:00-da “Azərsun Arena”da Ağdamın “Qarabağ” komandası ilə üz-üzə gələcək.
Paytaxt təmsilçisi hazırlıqların ikinci mərhələsi üçün Türkiyəyə yollanacaq. İyunun 25-dən iyulun 2-nə qədər Bolu şəhərində təlim-məşq toplanışında olacaq “Zirə” burada daha iki yoldaşlıq görüşü keçirməyi planlaşdırır. İyunun 27-si və iyulun 1-nə təyin olunan bu matçlardakı rəqiblər və oyunların start fitinin vaxtı barədə növbəti günlərdə məlumat veriləcək.