Premyer-Liqanın 3-cü turunda “Zirə” “Kəpəz”i darmadağın edərək mövsümdə ikinci qələbəsini qazandı. Artıq ilk yarıda gəncəlilərin qapısına üç cavabsız qol vuran zirəlilər rəqibə heç bir şans vermədi. Kapitan Qismət Alıyev, Cibrila və Junior fərqləndi.  

İkinci hissədə də vəziyyət dəyişmədi. “Zirə” rahatca oyunu istədiyi məcrada apararaq təşəbbüsü əldən vermədi. Boqomolskinin qolu isə ikinci yarının qalan hissəsini formallığa çevirdi. Oyunun sonuna yaxın Volkov baş zərbəsi ilə beşinci qolu vurdu. Bu epizodda qol pasını künc zərbəsindən ikinci hissədə meydana girən Namiq Ələsgərov verdi.  “Zirə” ilk dəfə 5:0 hesablı qələbə qazandı.

Heyətinə çoxlu sayda legioner qatan “Kəpəz”in oyunu hələ ki, ciddi təəssürat yaratmır. Komanda bu mövsüm dalbadal üçüncü məğlubiyyətini alaraq sonuncu pillədə möhkəmlənməkdədir. Gəncədə klubun güclənməsi üçün görülən işlər hələ ki, öz bəhrəsini vermir.

“Zirə” isə ötənilki kimi çempionatın iddialı komandalarından olduğunu bir daha göstərdi. Həm oyun, həm də heyətin formalaşması baxımından klub rəhbərliyinin ciddi işlər apardığının şahidi oluruq. Baş məşqçi Rəşad Sadıqov həm də intizamlı oyun qurmağı ilə seçilir. Komanda oyunboyu mütəşəkkil, intizamlı və xətlərarası boşluqlar vermədən oynayır. Qeyd edək ki, “Zirə”nin legionerləri də keyfiyyətli futbolu ilə seçilir.

Premyer-liqa, 3-cü tur

“Zirə” – “Kəpəz” 5:0

Qollar: Q. Alıyev, 13. Cibrila, 32. Junior, 37. Boqomolski, 71.  Volkov, 84.