Premyer Liqanın III turunun mərkəzi qarşılaşmasında “Zirə” ilə “Neftçi” üz-üzə gəlib. Zirə İdman Kompleksinin stadionunda keçirilən Bakı derbisində meydan sahibləri 1:0 hesablı qələbə qazanaraq çempionata üçdə üçlə başlayıblar.
İlk iki turda maksimum nəticə əldə edən komandaların duelində qarşılaşma kifayət qədər gərgin mübarizə şəraitində keçib. Tərəflər ilk dəqiqələrdən etibarən ehtiyatlı oyun nümayiş etdirib, qarşılıqlı hücumlara baxmayaraq, ilk hissənin böyük bölümündə hesabı açmaq mümkün olmayıb.
Lakin fasiləyə az qalmış “Zirə” hesabı dəyişib. Birinci hissəyə əlavə olunmuş 3-cü dəqiqədə meydan sahiblərinin kapitanı Qismət Alıyev dəqiq zərbə ilə topu “Neftçi”nin qapısından keçirərək komandasını önə çıxarıb – 1:0.
İkinci hissədə “Neftçi” hesabı bərabərləşdirmək üçün hücumlarını artırıb. Yuri Vernidubun yetirmələri daha fəal təsir bağışlasalar da, “Zirə” müdafiədə inamlı oynayaraq rəqibin təhlükəli hücumlarının qarşısını alıb.
Qonaqların işi 70-ci dəqiqədə daha da çətinləşib. “Neftçi”nin müdafiəçisi Elvin Bədəlov ikinci sarı vərəqəni alaraq meydandan kənarlaşdırılıb. Beləliklə, Bakı təmsilçisi qarşılaşmanın son bölümünü azlıqda keçirməli olub.
Say üstünlüyündən yararlanan “Zirə” isə qalan dəqiqələrdə hesabı qorumağı bacarıb. “Neftçi”nin bərabərlik qolu üçün cəhdləri nəticəsiz qalıb və meydan sahibləri 1:0 hesablı qələbə qazanıblar.
Beləliklə, Rəşad Sadıqovun komandası mövsümün ilk üç turunda maksimum – 9 xal toplayaraq turnir cədvəlinin zirvəsində qərarlaşıb. İlk iki turda qələbə qazanan “Neftçi” isə bu dəfə xalsız qalaraq mövsümdə ilk məğlubiyyətini alıb.
Qismət Alıyev isə həm kapitan kimi komandasına rəhbərlik etməsi, həm də qarşılaşmanın yeganə qoluna imza atması ilə Bakı derbisinin əsas qəhrəmanına çevrilib.
“Zirə” – “Neftçi” – 1:0 (1:0)
Qol: Qismət Alıyev, 45+3 (1:0).
Baş hakim: Elçin Məsiyev.
“Zirə”: Aydın Bayramov, İsmayıl İbrahimli (Hacıağa Hacılı, 84), Amin Seydiyev, Ayxan Hüseynov (Giorgi Papunaşvili, 75), Ruan Renato, Qismət Alıyev (k), Davit Volkov (İssa Cibrilla, 75), Quima, Vieyrinya, Anje Mutsinzi, Eren Aydın
“Neftçi”: Emil Balayev (k), Qustavo Klisman, Elvin Bədəlov, Emil Səfərov (Alen Şkribek, 46), Rüfət Abbasov, Fale Sako, İfianyi Metyu (Endryu Qravyon, 46), İqor Riberio, Lyubomir Tupta (Draqolyub Saviç, 46), Breno Almeyda, Freddi Varqas (Emin Mahmudov, 65).
Sarı vərəqələr: Metyu, Quima, Bədəlov, Renato.
Qırmızı vərəqə: Elvin Bədəlov, 70-ci dəqiqə (ikinci sarı vərəqə)Bakı, Zirə İdman Kompleksinin stadionu