Dünya futbolunun əfsanəvi isimlərindən olan Zinəddin Zidan Lionel Messini tarixin ən yaxşı futbolçusu adlandırıb. Fransalı mütəxəssis bu il “Qızıl top” mükafatının yenidən argentinalı ulduza təqdim olunacağı təqdirdə buna zərrə qədər də təəccüblənməyəcəyini vurğulayıb.

39 yaşlı hücumçunun irəliləyən yaşına rəğmən hələ də fantastik formada olmasını heyrətamiz adlandıran Zidan fikirlərini bu cür ifadə edib: “İnsanlar Messinin 39 yaşında hələ də dünyanın ən yaxşı futbolçularından biri olmasının nə dərəcədə inanılmaz bir hal olduğunu dərk etmirlər. Onun növbəti dəfə ‘Qızıl top’u qazanması məni qətiyyən təəccübləndirməz. Əgər kimsə tarixin ən yaxşı futbolçusunun kim olduğunu hələ də anlamırsa, deməli, onun ümumiyyətlə futboldan başı çıxmır”.

Xatırladaq ki, karyerası ərzində 8 dəfə “Qızıl top”a layiq görülən Lionel Messi hazırda həm “İnter Mayami”nin, həm də Argentina millisinin heyətində yüksək səviyyəli çıxışını davam etdirir. 2022-ci ildə ölkəsinə Dünya Kubokunu qazandıran, “Barselona”nın tərkibində isə dörd dəfə Çempionlar Liqasının zirvəsini fəth edən ulduz futbolçu milli komandada da mütləq rekorda sahibdir – o, yığmanın forması ilə çıxdığı 207 matçda 125 dəfə rəqib qapılarına yol tapıb.

Hazırda karyerasını ABŞ-ın MLS liqasında davam etdirən Messinin “İnter Mayami” ilə müqaviləsi 2028-ci ilə qədər nəzərdə tutulub. Qeyd edək ki, “tanqoçular”ın lideri bu il Argentina yığması ilə növbəti dəfə dünya çempionatının finalına qədər irəliləsə də, həlledici qarşılaşmada İspaniya millisinə məğlub olub.