“Sabah”ın baş məşqçisi Valdas Dambrauskas, Azərbaycan Kubokunun finalında “Zirə” ilə qarşılaşacaqları oyun öncəsi keçirilən mətbuat konfransında iddialı açıqlamalar verib. Litvalı mütəxəssis komandasının ardıcıl ikinci il finalda mübarizə aparmasını böyük uğur adlandırıb. Rəqibin gücünü vurğulayan baş məşqçi, komandasının matça tam hazır olduğunu bildirib: “Sabahkı matç bizim üçün tarixi fürsətdir. Karyeramda müxtəlif titullar qazanmışam və bilirəm ki, bu uğurlar heç də asan əldə olunmur. “Zirə”ni bura qədər gəldiyi üçün təbrik edirəm. Səbirsizliklə sabahkı oyunu gözləyirik və ümid edirəm ki, azarkeşlər əsl futbol bayramından zövq alacaqlar. Ötən il olduğu kimi, bu il də qalib gəlib adımızı tarixə yazdırmaq istəyirik. Kuboku qazanmaq üçün meydanda ona layiq olduğumuzu sübut etməliyik”.

Dambrauskas digər klubların turnir cədvəlindəki taleyinin onlara təsir etmədiyini xüsusi qeyd edib: “Nəyə görə başqa komandalara görə təzyiq hiss etməliyik? Bu, hər iki klub üçün tarixi oyundur. Bizim əldə edəcəyimiz nəticənin “Qarabağ” və ya “Neftçi”nin taleyinə necə təsir edəcəyi bizi maraqlandırmır. Bu barədə danışmağın mənası yoxdur, çünki biz meydanda özümüz üçün mübarizə aparacağıq”.