Türkiyə Superliqasında “Sivasspor” və “Beşiktaş” kimi klublardakı çıxışı ilə yadda qalan nigeriyalı hücumçu Maykl Eneramo 40 yaşında dünyasını dəyişib.

Nigeriya mənbələrinin məlumatına görə, hadisə Kadun ştatındakı “U/Yelwa” mini-stadionunda baş verib. Məşq zamanı qəfildən yerə yıxılan sabiq futbolçu dərhal xəstəxanaya çatdırılsa da, həkimlərin səyinə baxmayaraq, həyatını xilas etmək mümkün olmayıb. Nigeriya Futbol Federasiyası milli komandanın sabiq üzvünün ölüm xəbərini rəsmən təsdiqləyib.

Eneramonun ürəyindəki ciddi problemlər hələ illər öncə, o, karyerasının zirvəsində olarkən gündəmə gəlmişdi. 2013-cü ildə “Sivasspor”dan “Beşiktaş”a transfer olunarkən tibbi müayinədən keçən futbolçuda ürək ritminin pozğunluğu və ürək əzələlərinin zəif fəaliyyəti aşkarlanmışdı.

Həkimlər hələ o zaman nigeriyalı forvardın infarkt riskinin yüksək olduğu barədə xəbərdarlıq etmiş və bu səbəbdən onun “Beşiktaş”dakı çıxışı mütəmadi xarakter daşımamışdı.

Maykl Eneramo Türkiyə karyerasında “Sivasspor” və “Beşiktaş”la yanaşı, “Karabükspor”, “Başakşehir” və “Manisaspor”un da formasını geyinib. O, xüsusilə “Sivasspor”un heyətində göstərdiyi məhsuldarlıqla azarkeşlərin sevimlisinə çevrilmişdi.