UEFA-nın Apellyasiya orqanı gözlənilməz və ağır bir qərarla “Turan-Tovuz”un 2026/2027 mövsümündə UEFA Konfrans Liqasında iştirakına qadağa qoydu. İyunun 2-də rəsmiləşən bu qərar, klubun avrokubokların buraxılış meyarlarına cavab verməməsi ilə əsaslandırılsa da, məsələnin arxasında daha köhnə və qaranlıq bir səhifə dayanır.
Qitə futbol qurumunun bəyanatına görə, “Turan-Tovuz” Reqlamentin 4.01(g) maddəsini – yəni oyunların nəticəsinə təsir göstərmək və qanunsuz fəaliyyətlərdə iştirak etmək bəndini pozub. Söhbət 2019-cu ildə baş vermiş və uzun müddətdir “arxivlənmiş” sayılan insidentdən gedir. Həmin dövrdə AFFA-nın araşdırması nəticəsində klubun 7 futbolçusunun danışılmış oyunlarda iştirakı sübuta yetirilmiş və onlar diskvalifikasiya olunmuşdular.
Bu cəzanın ən düşündürücü məqamı, AFFA-nın sabiq rəhbərliyinin bu məsələdəki qaranlıq roludur. Güman ki, 2019-cu ildəki bu ciddi pozuntu ilə bağlı “Turan-Tovuz”un hazırkı rəhbərliyi vaxtında və şəffaf şəkildə məlumatlandırılmayıb.
Bu üzdən klubun yeni rəhbərliyi bu gün ağır bir bədəl ödəyir. Onlar belə bir ciddi ittihamın və UEFA tərəfindən tətbiq olunacaq potensial sanksiyaların xəbərdarlığını vaxtında almadıqları üçün özlərini fakt qarşısında qalmış vəziyyətdə görürlər. Görünən odur ki, AFFA-nın keçmiş rəhbərliyinin gizlətdiyi və ya rəsmi şəkildə məlumatlandırma aparmadığı bu problem, bu gün “Turan-Tovuz”un Avropa arenasına çıxışına ciddi maneə yaradıb.
Klub rəhbərliyi qərarı “ədalətsiz” adlandıraraq, hadisənin illər əvvəlki idarəçilik dönəminə aid olduğunu və hazırkı komandanın bu problemlə heç bir əlaqəsinin olmadığını vurğulayır. Tovuz təmsilçisi təslim olmağa hazırlaşmır: klub İdman Arbitraj Məhkəməsinə (CAS) müraciət edərək, keçmişin səhvlərinə görə cəzalandırılmasına qarşı hüquqi mübarizəyə başlayır.
“Turan-Tovuz”un CAS-dakı şanslarını qiymətləndirən ekspertlər məsələni bir neçə prizmadan şərh edirlər.
Klubun vəkilləri hadisənin 2019-cu ildə, başqa idarəçilik dövründə yaşandığını vurğulayaraq, hazırkı rəhbərliyin AFFA tərəfindən məsələ barədə vaxtında xəbərdar edilmədiyini sübut etməyə çalışacaqlar. Bu arqumentin klubun “yaxşı niyyətli tərəf” olduğunu təsdiqləmək və UEFA qarşısında öz mövqeyini müdafiə etmək üçün həlledici fakt olduğu vurğulanır..
CAS adətən qərarın mahiyyətinə baxarkən prosedurlara diqqət yetirir.
UEFA və ya AFFA-nın ötən illərdəki məlumatlandırma qüsurları, eləcə də hüquqi prosedur boşluqları aşkarlanarsa, bu, qərarın yenidən nəzərdən keçirilməsi və ya ləğvi üçün əsas yarada bilər.
UEFA-nın əlindəki sübutların sanballı olması işi mürəkkəbləşdirir. CAS-ın beynəlxalq qurumun qərarına müdaxilə etməsi üçün isə çox ciddi və təkzibedilməz dəlillərin təqdim olunması vacibdir.
İndi bütün gözlər AFFA-nın keçmiş idarəçilik dönəmi ilə bağlı verəcəyi izahatlara və CAS-ın yekun qərarına dikilib. Görəsən, Tovuz futbolunun avrokubok arzuları keçmişin qaranlıq arxivlərindəmi boğulacaq, yoxsa hüquqi mübarizə bu düyünü açaraq yeni bir yol cızacaq?