Uzun fasilədən sonra doğma azarkeşləri önünə çıxan “Turan-Tovuz” matça yüksək motivasiya ilə başladı. Qurban Berdiyevin yetirmələri ilk dəqiqələrdən rəqibə pressinq tətbiq edərək “Sumqayıt”ı müdafiəyə çəkilməyə məcbur etdi. Meydan sahiblərinin təzyiqi çox keçmədən bəhrəsini verdi. 9-cu dəqiqədə Ayxan Hüseynovun zərgər dəqiqliyi ilə ötürməsini Filip Ozobiç qola çevirərək hesabı açdı.
İkinci hissəyə də sürətli başlayan qərb təmsilçisi rəqibi yenidən hazırlıqsız yaxaladı. 50-ci dəqiqədə növbəti dəfə səhnəyə Ayxan Hüseynov çıxdı. Onun ikinci məhsuldar ötürməsini bu dəfə Jo Batista tora qovuşduraraq fərqi ikiyə çatdırdı.
İki top fərqi ilə geridə qalmasına baxmayaraq, Saşa İliçin baş məşqçisi olduğu qonaq komanda mübarizədən qopmadı.
Xüsusilə 60-cı dəqiqədə edilən üçlü əvəzetmədən sonra “kimyaçılar” hücumda daha aktiv görünürdülır. Bunun nəticəsi olaraq, cəmi 4 dəqiqə sonra sağ cinahdan edilən asmanı Rayan Senhaci başla dəqiq tamamlayaraq “Sumqayıt”ı ümidləndirib.
Oyunun son dəqiqələri gərgin mübarizə və qarşılıqlı hücumlarla yadda qalsa da, tabloda hesab dəyişməyib. Nəticədə “Turan-Tovuz” həm hesabına mühüm 3 xal yazdırıb, həm də avrokuboklar uğrunda mübarizədə iddialı addım atıb.
Tribunaların azarkeşlı dolması və əsl futbol bayramı ab-havasının hökm sürməsi bir daha oyunların futbolun beşiyi olan region şəhərlərinə qayıtmasının nə qədər vacib olduğunu göstərdi.
Turan-Tovuz – Sumqayıt 2:1
Qollar: Filip Ozobiç, 9 (1:0), Jo Batista, 50 (2:0), Rayan Senhaci, 64 (2:1)
Baş hakim: Kamranbəy Rəhimov
“Turan Tovuz”: Oleq Baklov, Filip Ozobiç (Xəyal Nəcəfov, 70), Rəhim Qasımov, Faiq Hacıyev (k), Ayxan Hüseynov (Fərid Yusifli, 78), Jo Batista, Emmanuel Hakman, Hayderson Urtado, Jorje Silva, Roberto Olabe, Mark Mampassi.
“Sumqayıt”: Mehdi Cənnətov (k), Höccət Haqverdi, Nihad Əhmədzadə (Nikola Ninkoviç, 60), Nadir Orucova, Aleksandr Ramalinqom (Rüstəm Əhmədzadə, 60), Rayan Senhaci, Danilo Beskorovaynı, Ronaldo Vaskes, Masaki Murata (Səbuhi Abdullazadə, 60), Nsana Simon, Aleksa Yankoviç.
Sarı vərəqələr: N. Əhmədzadə, 17. Hakman, 45. D. Beskorovaynı, 48. F. Hacıyev, 58. N. Orucov, 90.