Nyu-Yorkda keçirilən NBA finalında azarkeşlərin etirazı ilə üzləşən ABŞ Prezidenti Donald Trampın DÇ-2026-nın ilk oyununda iştirak etməyəcəyi dəqiqləşib.
Axel Springer Global Reporters Network-un məlumatına görə, cümə günü keçiriləcək ABŞ – Paraqvay matçında prezident tribunadakı yerini boş buraxacaq.
ABŞ rəsmi nümayəndə heyətinə Dövlət katibi Marko Rubio rəhbərlik edəcək. Maraqlıdır ki, Paraqvay Prezidenti Santyaqo Penya artıq Los-Ancelesə yollanıb və dörd günlük səfəri çərçivəsində cümə günü baş tutacaq qarşılaşmanı stadiondan izləyəcək.
Trampın bu qərarı turnirlə bağlı mövcud logistik çətinliklər və bir sıra ölkələrin nümayəndə heyətləri üçün yaranan viza problemləri fonunda diqqət çəkir.
Prezident Tramp dəfələrlə mundialı və 2028-ci ildə Los-Ancelesdə keçiriləcək Olimpiya Oyunlarını rəhbərliyi dönəminin ən əhəmiyyətli beynəlxalq hadisələri kimi dəyərləndirib. Bu tədbirləri “Amerikanın gücünün nümayişi” adlandıran prezidentin, dünya diqqətinin mərkəzində olacaq açılış oyununda iştirakdan imtinası, siyasi ekspertlər tərəfindən müəyyən suallar doğurur.