“Trabzonspor”un yeni transferi Məhəmməd Salah yekun keçid prosedurlarını tamamlamaq üçün Türkiyəyə gəlib. Aeroportda coşğu ilə qarşılanan misirli hücumçunun azarkeşlərlə görüntüləri böyük marağa səbəb olub.
Türkiyəli tanınmış jurnalist Yağız Sabuncuoğlunun məlumatına görə, 34 yaşlı ulduz “bordo-mavililər”lə 2 illik müqavilə imzalayacaq. Salahın İllik məvacibinin 17 milyon avro olacağı bildirilir.
Transferlə bağlı diqqətçəkən digər detal isə futbolçunun forma nömrəsi ilə bağlıdır. “Trabzonspor” rəhbərliyi ilk olaraq Salah üçün 11 nömrəli formanı hazırlasa da, misirli ulduz yığmada olduğu kimi 10 nömrə altında çıxış etmək istədiyini bildirib. Hazırda bu nömrəni daşıyan Ernest Muçi həmkarına jest edərək 10 nömrəni ona güzəştə gedib.
Qara dəniz təmsilçisi azarkeşlərini də unutmayıb. Klub rəhbərliyi daha əvvəl Məhəmməd Salahın adı ilə 11 nömrəli forma alan fanatlar üçün müraciət edəcəkləri təqdirdə formadakı nömrənin ödənişsiz olaraq 10-la əvəzlənəcəyini açıqlayıb.