Bolqarıstanın Samokov şəhərində yeniyetmə (U-17) güləşçilərin Avropa birinciliyi davam edir. Yarışın növbəti günündə Azərbaycan millisinin həm oğlan, həm də qız idmançıları xalça üzərinə çıxır.

Bu gün xalça üzərinə çıxan sərbəst güləşçilərimiz Avropa birinciliyinə inamlı start veriblər. Artıq 3 təmsilçimiz rəqiblərini sıradan çıxararaq adını dörddəbir finala yazdırıb. Belə ki, Hüseyn Rzazadə (48 kq), Rəşid Nəzərov (65 kq) və Hakim Tağıyev (110 kq) ardıcıl qələbələrlə 1/4 finala vəsiqə qazanıblar. Digər pəhləvanımız Nihad Süleymanlı (80 kq) mübarizəyə 1/8 final mərhələsindən davam edəcək, Abbas Şafiyev (55 kq) isə xalçaya çıxmaq üçün öz növbəsini gözləyir.

Eyni zamanda, bu gün qızlardan ibarət millimizin iki üzvü Avropa birinciliyinin bürünc medalı uğrunda həlledici xalça döyüşünə çıxacaq. Nuray Cəfərli (46 kq) və Fatma Bayramova (53 kq) fəxri kürsünün üçüncü pilləsinə qalxmaq üçün var qüvvələri ilə mübarizə aparacaqlar. Təəssüf ki, 69 kq çəki dərəcəsində çıxış edən Simurə Abdullayeva təsəlliverici görüşdə rəqibinə məğlub olaraq yarışı medalsız başa vurub.

Hazırda Azərbaycan yığmasının aktivində 7 medal (1 qızıl, 3 gümüş, 3 bürünc) var. Yeniyetmələrin Avropa birinciliyinə mayın 17-də yekun vurulacaq.